CONGRATULATIONS sa tanang nakadaug! “Better luck next time” sab sa nangaparot.

Ingon gayud niini ang politika. Walay modaug kung way mapildi.

Ang importante kay inyong nasulayan nga modagan og gihuman ninyo ang kampanya nga wala mokakak sa kontra. Balik barangay sab ang mga kapitan nga nisulod sa royda sa bugnong lugaynon.

Dinhi makita ang kalisud dag-on ang politika kung kulang ka sa sapi, makinarya, kabaskog sa lawas ug maayong mensahe ug taktika sa kampanya.

Dili bastante nga ilado ang imong pangalan o gitaas ni Mayor Sara ang imong kamot nga modaug ka na. Halos tanang kandidato gi-indorso sa mayor og presidente apan pila ra ang nidaug.

Dunay mga kandidato nga independente ug walay pangalan ug walay dagdag-bawas nga nidaug sa eleksiyon tungod sa ilang talagsaon o pinasaheng nahimo sa lungsod.

Dinhi sa Davao region nindot ang resulta sa tulo ka probinsiya. Naay mga “political dynasty” nga naparot samtang naa poy nagpabilin.

Tungod kaha kini sa sapi o gipul-an na ang tawo kanila? Kamo ra gayod nga hingtungdan ang nahibalo taliwala sa gibalitang “massive vote-buying” sama sa nahitabo kuno sa probinsiya sa Bohol diin ang atong “white hair” Leoncio “Jun” Evasco naparot batok ni kasamtangang Gov. Arthur Yap.

Sa laing bahin kulbahinam ang resulta sa pagkasenador kay mora’g sakto ang tagna nga dala tiaw nga modiretso sa inuduro ang Otso Diretso base “unofficial tally”.

Mao sab ang dagan sa pagka-kongresista nga halos tanang nakadaug alyado o posibleng maalyado sa administrasyon.

Kung magpadayon kini, madayon na kaha ang pagduso sa “Pideralismo” sa nasud nga gisaad sa pangulo?

Bisan tuod daghan ang bersiyon sa Pideralismo nga wa masabti sa tawo, ang inisyal nga sentimento mao nga angay nang ilisdan ang kasamtangang sistemang politikal sa nasud diin dili patas ang pagbahin-bahin sa bahandi ug sa paagi sa pagpamuno niini.

Una nga lakang aron madayon kini mao ang pag-usab sa Batakang Balaod pinaagi sa “constitutional convention” (con-con) o sa “constituent assembly” (con-ass).

Sa akong tan-aw iduso sa presidente ang con-ass aron madayon ang pag-usab sa sistema sa politika gikan sa bicameral presidential ngadto sa pideral sud sa iyang administrasyon.

Seguradong anaa gihapon ang maiinit nga dibati sud sa kongreso apan sa paglugdang sa tanan, ang baruganan sa kadaghanan maoy matuman.

Pabor na ang numero ngadto sa administrasyon busa sayon na lang unya ang pagtimon kanila sa mga gustong kausaban sa presidente nga di niya mahimo sa niaging tulo ka tuig.

Kung unsa may madulngan niini, mangandam na ta mga ka-benehan!