LAING bati nga tabi-tabi ang nikatap sa social media sa niaging mga adlaw nga si Presidente Rodrigo Duterte gisulod sa ospital sa San Juan City human matud pa giatake sa kasingkasing.
Apan niadtong Dominggo, si kanhi special assistant to the president (SAP) Bong Go nagpagawas og hulagway uban ni Pres. Duterte nga nangaon og noodles aron nga pamatud-an nga himsog ang presidente ug di tinuod ang nikatap nga tabi-tabi.
Di kini maoy una nga higayon nga dunay nikatap nga bati nga tabi bahin sa Presidente. Gani niadtong mga nilabay nga panahon, nikatap gyud sa social media nga namatay na ang Pangulo.
Gihimakak sab kadto dayon ni Go sa dihang nagpagawas sab siya og litrato nga ang presidente nikaon uban sa usa ka babayeng bisita. Nagpamatuod nga okay lang ang Presidente.
Lisud itumbok ang nagpasiugda niini kay nikatay-katay na man lang sa social media. Ingon niini, kadali, ning panahona, ang mopakatap og peke nga mga istorya tungod sa teknolohiya kay dali lang patuohon ang mga tawo bisan og di tinuod ang istorya. Usa kini sa daghang di maayong epekto sa teknolohiya ning panahona.
Apan wala ta moingon nga dautan ang teknolohiya. Ang nakaparat lang kay dunay pipila ka mga tawo nigamit niini sa dautan nga paagi.
Unta di dayon kita motuo sa atong mabasa o makita sa social media ug i-share dayon. Angay gihapon nga susihon nato kon duna ba kini kamatuoran o wala. Lisud na kon apil kita nga nagpakatag og dautan nga istorya sa tawo kay gi-share sab nato ngadto sa atong mga higala sa social media.
Kinahanglan nga responsable kita sa paggamit sa atong mga gadgets ning panahona.