MALITA, Davao Occidental -- Milingkod na isip bag-ong pamuno sa 73rd Infantry Battalion (IB), Philippine Army si Lieutenant Colonel Ronald Valdez.
Gihimo ang “change of command ceremony” sud sa ilang kampo sa Barangay Felis, adlaw’ng Dominggo, Mayo 19.
Mismong si 10th Infantry Division commander Major Gen. Jose Faustino Jr. ang miinstalar kang Valdez hulip ni Lieutenant Colonel Marion Angcao.
Si Angcao milapas na og upat ka bulan sa gitakdang duha ka tuig nga pagpamuno sa militar human mihangyo og ekstensyon ang mga opisyal sa probinsiya.
Naila si Angcao sa iyang maayong lider ug tinud-anay nga serbisyo human milingkod nga pamuno sa 73rd IB gikan Enero 19, 2017 hangtud Mayo 18, tuig kasamtangan.
Samtang, gidayeg ni Governor Claude Bautista ang dedikasyon ni Angcao sa iyang trabaho ug ang kaisog niini sa pakigbisog sa mga teroristang komunista hinungdan nga nabawi sa militar ang 23 ka nagkadaiyang matang sa armas ug 5 ka improvised explosive devices (IEDs).
Apil sa giimplementar ni Angcao, ang Community Support Program (CSP) alang sa 5 ka barangay sa Davao Occidental nga anaa ang impluwensiya sa mga NPA.
Nitabang sab ang militar sa kapulisan aron ipatuman ang kampanya batok ilegal nga druga ug anti-criminality law enforcement operations nga maoy nakapahuyang sa operasyon sa Guerilla Front 71 ug mga kriminal.
Gipasalamatan sa mga opisyal sa probinsiya si Angcao tungod sa kontribusyon niini sa ilang kahapsay’g kalinaw.
Samtang si incoming 73rd IB chief Valdez nisaad dayon nga ipadayon ang mga nabiyaang programa ni Angcao ug nangayo sa kooperasyon sa mga ginsakpan aron magpadayon ang ilang mga tumong alang sa pag-protekta sa katawhan sa probinsiya. Orlando B. Dinoy