DAKPAN ang duha ka mga tulisan human sila gitabangan og gukod sa mga residente atol sa ilang pagtulis sa natulog nga drayber sa pedicab sa Beach Club, Lizada Village, Lanang, Davao City niadtong Dominggo sa hapon, Mayo 19.
Giila ang dinakpan nga sila alyas Gerry ug alyas Jay parehong 18-anyos ug residente sa Doña Asuncion, Bo. Pampanga ning siyudad.
Samtang ang biktima giila nga si alyas Ed, 46-anyos, usa ka pedicab driver ug residente sa Doña Asuncion Village, Bo. Pampanga.
Giingon nga naghigda ang biktima sa iyang ginamaneho nga pedicab, dihang miabot ang duha ka suspek ug gitionan og kotsilyo ang biktima dayon gikuha ang kwarta niini.
Human sa hitabo, misibat ang mga suspek apan ang biktima nakapangayo og tabang sa mga kauban niini ug gigukod ang mga suspek hinungdan nga nadakpan.
Nakuha sa posisyon sa mga dinakpan ang kwarta sa biktima ug kotsilyo nga ilang gigamit.
Priso karon ang mga suspek sa Sasa Police Station. (Richy F. Nalagon)