TAGUM CITY -- Mokabat sa P1 milyon ang kantidad sa gituohang shabu nga nakuha sa posisyon sa mag-uyab sa gikasa nga drug bust sa Bunawan Police Station, Lunes sa kaadlawon, Mayo 20, sa North Eagle 1, ning siyudad.
Ang mga suspek nailhang sila Michael Duarte, 37-anyos, ug si alyas Irine, 24-anyos, pulos nagpuyo sa nasampit nga dapit.
Sumala ni Police Major Noel Villahermosa, station commander sa Bunawan Police Station, nga dugay na nilang gipanubayan ang ilegal nga lihok sa mga dinakpan sanglit notado silang tigpayuhot og druga sa Davao del Norte ug sa utlanan sa Davao City nga mao ang Bunawan District.
Giingon ni Villahermosa nga si alyas Irine ang tigdawat sa kuwarta samtang si Duarte ang modunol sa items.
Dose ka mga pakite sa gituohang shabu nga mibalor sa P1 Milyon ang nakuha sa posisyon sa mga dinakpan.
Kasong pagsupak sa Republic Act 9165 kon Comprehensive Dangerous Drugs Act of 2002 ang ipasaka batok sa mga suspek didto sa korte. (Richy F. Nalagon)