MOKABAT 350 ngadto na sa 400 ang mga natalang mga aksidente matag bulan ilabi na ang mga motorsiklo sa nagkadaiyang dapit sa siyudad sa Cagayan de Oro.
Matud ni Nick Jabagat, ulo sa City Disaster Risk Reduction and Management Department (CDRRMD), nga pinakadaghan nga ilang mga narespondehan mao ang mga aksidente sa kadalanan ilabi na mga motorsiklo.
“Mao nay pinakadaghan sa pagkakaron ga average ta og 350-400 sa usa ka bulan,” matud ni Jabagat.
Gidugang pa niini nga maayo na lamang nga anaa sa dili motaas sa 10 porsyento ang mga nangamatay sa aksidente apan gihapon dili kini maayo nga mga ihap sa aksidente.
“Pasalamat ta kay dili ra kayo, naa ra sa less than 10 porsyento but mga deformities dili healthy paminawon nga ingon ana nga klase nga report,” dugang niini.
Nagpahimangno usab si Jabagat sa mga nagmotorsiklo nga mag-amping kanunay ilabi na nga sagad niini mao ang mga nakainom samtang nagmaneho.