NAGPAHIMANGNO ang tinugyanan sa Regulatory and Complaint Board (RCB) sa Cagayan de Oro sa mga ginikanan lakip na sa mga estudyante ug mga patigayon pagsugod sa klase karong Hunyo 3.
Sa pakighinabi kang abogado Edgardo “Egay” Uy, tsirman sa RCB gipahinumdoman niini ang mga kabataan sa pagdula sa mga internet cafe gikan alas 7 sa buntag ngadto na sa alas 3 sa hapon atol sa pagbalik sa klase.
“Hapit na gyud mobalik ang atong mga kabataan sa eskwelahan, magpahinumdom na sab ang RCB mahitungod sa mga regulasiyon nato sa mga internet shops ug mga piso net kay dunay mga oras nga gidili ang pagdula sa mga violent games,” matud ni Uy.
Gidugang pa niini nga ang mga pornographic sites ang ginadili dili lamang sa menor de edad apan lakip na ang si bisan kinsa.
“Motabang na lang ta nga lugar dili tugotan ang mga menor de edad nga magdula sa mga gidili nga mga oras, dili nalang nato istoryahan ang multa ang ato nalang pagtabang sa mga ginikanan nga matarong sab ang kaugmaon sa atong mga anak,” dugang niini.
Giingong ang mga patigayon ang nasusi na, ilabi na nga sa mga magkuha og permit kinahanglan nga magkuha og RCB clearance apan padayon gihapon ang ilang mga pag-inspeksiyon.