NAGHATAG ang siyudad sa Cagayan de Oro og ganti sa makatudlo ngadto sa nagsabotahe sa linya sa panubig sulod sa taud-taud na nga panahon sa Barangay Indahag sa maong siyudad.
Gibutyag ni Teodoro Sabuga-a Jr., city administrator sa Cagayan de Oro, nga naghatag og ganti ang lokal nga kagamhanan aron matumbok ang responsable niini ug mahunong ang maong kalihokan.
“Initially gabutang og P10,000 nga reward ang tuyo nato pagmotivate pud sa atong igsoon kung kinsa ang makasapon sa tawo nga naghimo ani nga salaod,” matud ni Sabuga-a.
Giingong pa-imbestigahan kini sa kapulisan sa Cagayan de Oro City Police Office (Cocpo) aron nga masikop na ang naghimo niini, tungod looy ang katawhan nga nagkinahanglan og tubig ug gani nagpadala na og sulat ngadto kang Police Colonel Nelson Aganon, city director sa siyudad.
“Gatuyoon gyud nga gasunogon ang pipe ug dili man galeng gabundakan sa bato ikatulo nga incident gitigbas na sab, grabe nga pamerwisyo kini, di man ni makatarunganon,” matud ni Sabuga-a.
Gikabutyag nga nagsugod kini niadto pang pagkahuman sa eleksyon sa barangay ug gani naghatag na kini og incentives ngadto sa mga barangay tanod aron magbantay.
Nasayran nga sa post sa Facebook sa usa ka Richard Repulo, nasayran nga makita nga sayang kaayo ang tubig human naguba ang dakong tubo.
Makita usab nga dunay gibilin nga t-shirt ni Vice Mayor Rainier Joaquin Kikang Uy hinungdan na usab nga gi pa-imbestigahan sa siyudad.