NASIKOP sa kapulisan ang manghud sa napatay nga kawatan human napusilan sa gwardiya, ug ang duha ka kauban niini, sa Centro Police, Martes sa kaadlawon, Mayo 21.
Una nga na-report ang 22-anyos nga si Junrey Alinsug, kinsa namatay sulod sa taxi nga gisakyan, human nakaangkon og samad pinusilan sa iyang dughan.
Nasakpan kini sa gwardiya sa usa ka establisemento sa Barangay Maguikay, nga nangawat unta, giingon nga gidunggab niini ang gwardiya, hinungdan nga gipusil kini.
Basaha: Batan-ong kawatan napatay sa sikyu
Atol sa gihimo nga follow-up operation sa kapulisan sa Centro Police station, nadakpan ang manghod ni Junrey nga si Reynaldo Alinsug, 20, sa Sitio Malibu, Barangay Subangdaku, sa dihang nagpulaw kini sa haya sa iyang magulang.
Matud ni Police Major Aldrin Villacampa, gihimo ang follow-up operation human sa mga nahitabo nga pagpanulis sa sulod sa usa ka Public Utility Jeepney (PUJ), diin niadtong Biyernes sa kaadlawon, Mayo 17, tulo ka mga pasahero sa PUJ ang nidangop sa police station human mabiktima sa tulis.
Pinaagi sa kuha sa closed-circuit telivision sa command center sa Mandaue City hall, diin nakuhaan ang pagsakay sa mga tulisan sa usa ka PUJ nga may rota Lapu-lapu City padung sa Parkmall, ug sa paghulagway sa mga biktima ug sa tabang sa mga kanhi tulisan nga nasikop na, nailhan ang usa sa mga nitulis nga si Reynaldo.
Nakuha gikan kang Reynaldo ang usa ka batanggas nga maoy gigamit niini sa pagpanion.
Giangkon hinuon kini ni Reynaldo, apan nanghimakak nga kanunay na siya nanulis, matud niya nga unang higayon pa kadto.
Giangkon sab niini nga nasayod siya sa pagpangawat sa maguwang nga si Junrey, apan dili sila kauban.
Dugang ni Reynaldo, nga wala sila mag-uban sa usa ka balay sa iyang maguwang, kay wala na silay ginikanan.
Nagdaku si Reynaldo sa kalsada ug nagalgaal sa barkada kon ngano naaghat nga manulis.
“First time pa to nako, nagalgal lang ko kay daghang problema sa pamilya,” asoy ni Alinsug.
Si Reynaldo na usab ang nipyait sa kapulisan sa iyang mga kauban, kinsa nasikop sa Barangay Banilad sa Siyudad sa Mandaue, apan sa grupo, dugang duha lang kanila ang nasikop nga giila sila Reynaldo Pardillo, 18, taga Suba-Pasil, Siyudad sa Sugbo ug Rekomel Manzo, 19.
Ang duha ang nakuhaan og 38 revolver nga armas nga giingong kinawat usab gikan sa usa ka security guard sa Barangay Talamban sa Siyudad sa Sugbo,
Aduna usab nasakmit nga usa ka gamay nga pinakete sa shabu.
Gitug-an ni Villacampa nga ang grupo ang lakip sa mga notado na nga manulisay ug kawatan sukad pa sa menor de edad pa kini nga gipanguluhan sa usa ka ginganlan og “Kevin.”
Na-recover ang usa sa mga gadget nga kinawat, gikan na sa usa ka gwardiya sa IT Park, Dakbayan sa Sugbo, kinsa gibaligyaan sa kinawat nga cellphone sa kantidad lang nga P3,000.
Panawagan sa kapulisan sa mga nabiktima sa maong mga tulisan sa pagduaw sa ilang buhatan aron sa pagpasaka pa sa dugang nga kaso batok sa mga dinakpan. (Superbalita Cebu)