ALAS nuybe na sa gabii. Samtang naghigda si Lance, 33 anyos, sa kama gi-teksan niya si Kyzha, 25 anyos, kon puwede sila mag-text romance sa di pa mangatulog. Nahibulong siya kay morag nasuko si Kyzha sa tinubagan niini. Dili na mahimo ang iyang gihangyo. Hinuon, wa pa sila magkita sa personal kay taga Davao man si Kyzha ug siya (Lance) taga Cebu. Ning ilang relasyon may mga gabii o kaadlawon nga mag-romansa sila gamit ang ilang selpon ug mga tam-is nga pulong nga mopahayag sa ilang gibati ug gibuhat. May kalipay nga ilang nakab-ot sa maong sitwasyon. Nagka-textmate sila kay nabasahan man niya ang ngalan ni Kyzha sa usa ka Binisayang magasin, diin nag-wanted kini og textmate. Unya mitunog ang iyang selpon. Incoming call ni Kyzha.
“Lance, undangon na ni nato atong binuang!” ni Kyzha. “Wa ni sangkoan nga maayo.”
“Why man? Wa na diay ka malipay sa atong texmatet relation?” ni Lance.
“Wala na! Goodbye!” ni Kyzha nga mipawong sa iyang selpon.
Sukad niadto wala na sila mag-kontakay si Kyzha. Di na kini motubag kon teksan o tawgon. Busa mihukom siya nga ipadala ang iyang numero ug ngalan sa magasing Binisaya nga nag-wanted siyag textmate nga nag-edad og 33 anyos paubos. Paglabay sa duha ka semana diha nay mi-teks nga gustong makig-textmate niya.
“Am Angella, 31 y.o. & single, Taga Mabolo, Cebu. Silingan sa inyo, sa Mandawe, ” mensahe sa babaye. “Maguwang kag duha ka tuig, Lance. Pwede ta mag-textmate. Tinuod kang ulitawo?”
“Yes, I’m still a bachelor and looking for a woman who’ll love me and be my wife.”
Nanglabay ang daghang mga adlaw nga kanunay nag-teksanay silang Lance ug Angella. Usahay magtawganay sila sa selpon ug nasinati nila ang tagsa-tagsa nila ka tingog.
Usa ka gabii sa dayon nang matulog si Lance gi-teksan niya si Angella.
“Angella, don’t get angry, pero okey ka mag-text romance ta karon before sleep?” mensahe ni Lance. Wa mo-teks agig tubag si Angella. Hinuon, gitawgan niini si Lance.
“Lance, let’s do it with our voices. It’s more realistic than texting,” ni Angella.
“Okey,” ni Lance. “Maggakos ta ug maghalok, lips-to-lips!”
“I like it. Tsup! Tsup! Tsup!” ni Angella. Sa ilang banos-banos nga tinubagay sa ilang pagbati nahiabot da sila sa kinapungkayan sa ilang kalipay. Mihunong sila sa ilang gibuhat.
“Gusto ko makigkita nimo personal, Angella. Okey ka?” ni Lance. “Na-in love man ko nimo!”
“The feeling is mutual. Kon tinuod kang ulitawo, let’s get married!” ni Angella. “Milapas na kog usa ka tuig sa kalendaryo. Gusto na kong magminyo ug makabaton og anak. Asa ta magkita?”
“Sa patio sa inyong simbahan sa Mabolo. Magsul-ob kog itom nga T-shirt,” ni Lance.
“Mag-sinina kog puti. Magkita ta ugma sa buntag, mga alas nuybe. Okey?” ni Angella.
Pagka buntag didto na si Lance sa patio sa simbahan sa Mabolo, apan wa siya magsul-ob og itom nga T-shirt kay sutaon una niya ang pamayhon ni Angella kon maanyag ba kini o laksot. Maoy nasapnan sa iyang panan-aw ang usa ka madre nga nagsul-ob sa iyang puti nga habito ug ‘headcap’ nga itom. Naglingkod kini sa sementadong lingkuranan ilawom sa punoan sa akasya. Iya kining giduol.
“Sister, nakakita kag babaye nga nagsinina og puti kaganina?” nangutana si Lance.
“Wa man, Brad. Naghuwat ko sa akong kasabot nga lalake nga magsul-ob og itom nga T-shirt,” tubag sa madre. “Ikaw man hinuon ang nia nga pula ang T-shirt.”
“Unsay ngalan sa lalake nga imong gihuwat, Sister?” ni Lance.
“Lance,” hinay nga tubag sa madre nga mitan-aw sa guwapo nga nawong ni Lance.
“Ha? S-Sister, i-ikaw si Angella?” “Oo, ako si Angella. Ikaw, si Lance?”
“Yes. Pero di ko katuo nga usa ka madre ang akong bag-ong textmate!” ni Lance.
“Ayaw kabalaka, Lance,” ni Angella. “Dili ko tinuod nga madre. Kining habito inuslan ko sa akong ig-agaw nga madre nga naa sa Carmelite Monastery mag-alagad.”
“Mao ba, Angella?”
“Yes. Tana hinuon. Manulod ta sa simbahan ug mag-ampo nga magkadayon tang duha sa kaminyuon!” Migunit si Angella sa kamot ni Lance ug mitindog. (KATAPUSAN)