SA USA ka talagsaong hitabo, migawas nga ‘slight underdog’ si Filipino boxing icon Manny Pacquiao sa iyang pagpakigbatok kang American Keith Thurman karong Hulyo 20 sa MGM Grand Garden sa Las Vegas, USA.
Usa kini ka maayong musika alang sa pangdungog sa Pambansang Kamao ng Pilipinas.
Gipasabot sa 8-division world champion nga nakahatag kini kaniya og dugang kadasig.
Mibalik sa panumdoman ni Pacquiao dihang gikonserar siyang grabe ka ‘underdog’ sa iyang away batok kang Oscar De La Hoya niadtong 2008.
Niadtong higayuna, nagbangis og maayo si Pacquiao ug iyang gipaundang si De La Hoya sa 8th round nga maoy nagsilbeng agianan sa pagretiro sa Mexican legend.
“Beautiful. That’s what I want [to be the underdog],” matod ni Pacquiao sa interbyu sa Rappler.com.
“Just like with Oscar De La Hoya. It’s going to be an added motivation.”
Hinuon niadtong 2015, gikonsiderar sab nga ‘slight underdog’ si Pacquiao sa iyang batok kang Floyd Mayweather.
Napilde si Pacquiao niadtong higayuna apan gibutyag sa fighting senator human sa away nga aduna siya’y angol sa iyang tuo nga abaga hinungdan nga wala kaayo kini niya nagamit.
Si international matchmaker Sean Gibbons, kinsa maoy nagdumala ni Pacquiao, nagtuo nga adunay mga tawo nga nag-underestimate na kang Pacquiao tungod sa pangidaron niini nga 40.
“Thurman’s never fought somebody like the Senator,” matod ni Gibbons.
Ang 30 anyos nga si Thurman adunay impresibong 29-0, 22KOs nga rekord samtang si Pacquiao naggunit og 61-7-2, 39KOs nga baraha.
Si Pacquiao maoy naggunit sa World Boxing Association (WBA) welterweight ‘regular’ title samtang si Thurman maoy naghupot sa ‘world super’ title nga bersyon niini.
Sa laing bahin, niabot na si Pacquiao sa Amerika aron sugdan pag-promote ang ilang away ni Thurman. (ESL)