HUMAN sa eleksiyon, daghan sa among mga tigpaminaw sa radyo nga niingon nga dako ang akong nasapi sa milabay nga eleksiyon.
Makadungog man god sila sa among programa nga magbasa ko sa mga press releases nila Senator-elect Christopher “Bong” Go, Senator Sonny Angara, ug uban pa.
Madungog sab nila nga akong gihisgutan ang pangalan ni Kapitan Rico Antopuesto, kinsa igsuon sa among station manager nga si Rau Antopuesto, nga mikandidato pagka-board member sa second district sa Davao Oriental.
Gawas kanila, ako sab natimbaya ang pangalan nila Mar Lopez nga mikandadto pagka-konsehal sa New Corella, Davao del Norte; Dr. Sam Batiancilla nga mikandidato pagka-board member sa second district sa Davao del Norte; Dr. Arvin Malaza nga mikandidato pagka-board member sa second district sa Davao del Sur, ug Bong Calig-onan nga mikandidato pagka-konsehal sa Baganga, Davao Oriental.
Akong ipasigarbo nga wala gayud intawon ako nakadawat bisan og usa ka sentimo nila isip pahalipay sa pagbasa sa ilang press release.
Ang mga kandidato sa pagka-senador advertiser sa Manila Broadcasting Company mao nga halos kada adlaw dunay tag tulo ka pahina nga press release nga akong hubaron sa Cebuano.
Sa kandidatura ni Antopuesto, gihangyo kami sa among station manager nga lakbitan ang plata porma sa iyang igsuon.
Ang uban nga nahisgutan sa unahan, ako silang gitimbaya sa programa bisan di advertiser tungod kay mga kauban nako sila sa trabaho isip mga broadcasters.
Malipay naman god ko nga dunay mga broadcasters nga nahimong public servants aron daghan ang mga kabus nga matabangan.
Tingali, kung nisugot pa ko sa tanyag sa media group ni Rep. Pantaleon Alvarez ug Governor Dauglas Cagas nga mouban sa ilang kawsa sa pagdepensa sa maong mga politiko sa miaging tuig bugti sa libu-libo nga kantidad matag buwan, basin daghan ko karon og sapi.
Apan, tungod kay wa man ako nidawat sa ilang gitanyag, aw, di husto ang pagtuo sa among mga tigpaminaw nga nakasapi ako.
Ako silang gibalibaran tungod kay naningkamot ako nga mahimong patas sa mga isyu isip magsisibya sa radyo.