COTABATO CITY -- Hangyuon ni incumbent Maguindanao governor ug umaabot nga kongresista sa ikaduhang distrito nga si Esmael “Toto” Mangudadatu ang gobyerno nga tagaan og usa ka tuig nga tagal nga makighinabi sa Bangsamoro Islamic Freedom Fighters (BIFF).
Nasubo si Mangudadatu sa mga kabataan nga nailo gumikan sa giyera ilabi na sa probinsiya.
Nawad-an kini og paglaum human nahugno ang ilang panginabuhian hinungdan sa walay katapusan nga gubot sa ilang mga dapit.
Dako ang pagsalig sa opisyal sa abilidad sa bag-o nga namugna nga Bangsamoro Autonomous Region in Muslim Mindanao (BARMM) nga gipangulohan ni interim chief minister ug MILF Chairman Alhaj Murad Ibrahim.
Tumong niini nga istoryahon ang BIFF nga mobalik sa sabakan sa balaod alang sa panghinabing pangkalinaw gumikan mao kini ang ilang pangandoy sulod sa dugay na nga panahon.
Nanghinaut si Mangudadatu nga dunggon sa gobyerno ang iyang hangyo gumikan isip amahan sa probinsiya nakita niini ang bunga sa kagubot kung diin tanan pildi, apil ang militar ug mga rebelde.
Una nang namahayag ang BIFF nga andam nilang suportahan ang BARMM kung alang sa kaayohan sa mga Muslim, Kristiyano ug lumad. (Edgar E. Fuerzas)