PATAY na nga napalgan ang usa ka coach Lunes sa kaadlawon, Mayo 20, sa gihigdaan niini sa Maa National High School, Davao City.
Sumala sa report, giila ang biktima nga usa ka Pedrito Salonga Jr., 51-anyos, beach volleyball coach para sa secondary girls sa Republic Central Colleges sa Central Luzon ug residente sa Angeles City, Pampanga.
Sumala ni Police Lieutenant Damiano Albacite Jr., team leader sa Talomo Police Station, nga nadestino sa maong lugar aron bantayan ang mga Prisaa athletes ug ilang delegasyon.
Kaadlawon sa adlaw nga Lunes, gipukaw sa iyang igsuon nga executive director sa Central Luzon ang biktima apan wala na kini naglihok.
Busa dali nilang gidala ang biktima sa Southern Philippines Medical Center (SPMC), aron tambalan apan gideklara kini nga dead on arrival sa mga doktor.
Nasayran nga lima na katuig ang milabay miagi na og stroke ang biktima.
Giasikaso na ang patay nga lawas sa biktima nga madala sa Angeles City samtang walay nakitang foul play ang otoridad sa maong panghitabo. (Richy F. Nalagon)