NAGUBOT ang pagpa-tattoo sa usa ka babaye diha sa iyang bugan, didto sa New Loon Tugbok District, dakbayan sa Davao, Lunes sa gabii, Mayo 20, kay nagselos na ang uyab niini.
Giila ang nadunggaban nga usa ka alyas Che-Che, 26-anyos, usa ka overseas Filipino worker ug residente sa dapit samtang ang suspek iya lang kapuyo nga si alyas Mike, 30-anyos.
Subay sa blotter nga natala sa Tugbok Police Station, nasayran nga una pa nahitabo ang kasamok, nag-inum si Mike dihang miabot ang kapuyo nga si Che-Che uban ang tattoo artist nga si alyas Bodoy sakay sa motor nga gimaneho ni alyas Raffy.
Dihang nagprepara na ang tulo alang sa tattoo session, nagselos si Mike kay iyang nasayran nga magpa-tattoo ang iyang kapuyo sa paa ug sa ubang parte sa kalawasan.
Misamot og kasuko si Mike dihang iyang nakita nga sa bugan na nagpa-tattoo si Che-Che.
Sa kasuko sa kapuyo, giadto niya ang tulo ug gitigbas ang motor ni Raffy, dayon gikompronta niini ang tattoo artist ug ang drayber diin diriyot niya kining panigbason ug dunggabon.
Sa maong hitabo, gilayong mipatunga si Che-Che, hinungdan nga nasamad siya dihang iyang gisulayan og pugong ang kamot sa iyang kapuyo.
Apan, dihang nasayran sa igsuon nga lalaki ni Che-Che ang insidente, gilayon niyang giadto si Mike dayon gitigbas tumong sa ulo apan nakalikay lamang kini.
Mismong ang tattoo artist ang mipatala sa kapulisan ug nagdala og pulis sa lugar apan, nakasibat ang suspek nga padayong gipangita karon sa kapulisan.