MATOD pa sa balita, dunay plano si kanhi Cabinet Secretary Leoncio Evasco Jr. nga mosang-at og petisyon aron i-deklarara nga dunay “failure of election” sa lalawigan sa Bohol tungod sa grabe nga palit sa boto o vote-buying.
Si Evasco milansad pagka-gobernador sa Bohol apan si Cong. Art Yap, nga usa sa lima ka mga kandidato sa maong posisyon, ang midaog sa bag-o pa lang nahuman nga piniliay.
Katungod ni Evasco ang pag-sang-at sa maong kaso sanglit nakalagda man sa balaod ang maong katungod.
Buot ipasabot, pamatud-an ni Evasco pinaagi sa lig-on nga mga ebidensiya ang grabe nga pamalitay og boto sa lalawigan sa Bohol.
•••
A long shot legal remedy, matod pa sa usa ka abogado.
Nganong long shot man?
Matod pa niya, kinahanglan makapakita si Evasco og bug-at nga ebidensiya nga makapamatuod nga grabe o massive gyod ang pamalitay og boto dili lang sa usa o pipila ka mga lungsod kondili sa tibuok lalawigan.
Lisod ang pagmatuod niini, matod pa niya.
Ikaduha, matod pa niya, duna nay gihimo nga proklamasyon sa midaog sa maong piniliay.
Buot ipasabot, giproklamar na ang mga mananaog sa miaging piniliay.
Kon padayonon ang maong petisyon, sama sa gi-kwestiyon ra sab ang legalidad sa maong proklamasyon sa mga mananaog. Tungod niini, pwede nga maapil sa maong pagkwestiyon sa legalidad ang mananaog sa pagka-gobernador, bise-gobernador, kongresista, pagka-mayor, bise-mayor, mga board members ug hasta ang mga miyembro sa sangguniang bayan.
Hinuon, mag-agad na kini sa mga abogado ni Evasco og unsa nga legal remedy ang ilang pagahimuon.
Sa gika-ingon ko na, katungod ni Evasco ang pag-sang-at sa maong petisyon.
•••
Unsa katinuod nga duna nay nakasulod nga mga “imported” nga mga bulad nokos ug danggit sa ilado na kaayo nga merkado sa bulad sa Sugbo–ang Taboan?
Matod sa kasaligan nga tinubdan, mismo ang nagtinda ang nagsulti kaniya nga duna nay nagbaligya sa maong “imported” nga mga bulad.
Unsay kalainan sa “imported” nga bulad sa mga bulad nga lokal?
Ang bulad nga lokal, molagom og gamay ang unod samtang magkadugay apan ang “imported” nga bulad, padayon nga mag-puti og nindot lang gihapon tan-awon bisan pa kon dugay na kini nga gibaligya.
Tinuod ba kini?
Og duna pay laing pangutana.
Tinuod ba kining maong mga bulad?