SA UBAN, maingon-ingon. Apan kining lindog nagtuo nga nakalitan lang si Gwen tungod sa iyang di makalimtang kahiubos sa suod niyang mga tawo nga ningtalikod kaniya dihang siya nasuspenso.
Kinsa man usab ang makalimot kon ikaw talikdan taliwa sa imong kalisod? Labi na kon kini sila nagtraydor kanimo. Ang audit performance nga iyang himuon makatarunganon.
Apan di matangtang ang mga regular ug permanente. Hinuon, malahugay ang mga regular ug ibalhig laing assignment o kaha puwesto. Ang tanan depende sa gobernador.
Klaro, nga ang mga tawo ni Davide kadtong mga casual ug job order di ma-renew ang Special Order (SO), apan kadtong ninbalitok ningboto kang Gwen maluwas.
Ingon ani ang mahitabo kon mag-ilis ang administrasyon bisan asang kagamhanang lokal. Alang-alang man kon di nimo patrabahuon ang mga supporters.
Bisan ang nagbinuotan mahimong way mahimo kon ang kawani di regular ug permanente. Di makatandog si Gwen sa mga permanente hinuon isip gobernador siya makabalhin nilag assignment.
Duna gani koy nahibaw-an sa usa ka lokal nga kagamhanan nga ang permanenteng Clerk 1 gibalhin isip comfort room isip tiglimpyo.
Hinaot nga ang kainit sa kahiubos o kalagot ni Gwen may pag-utlan alang sa kaayuhan sa Sugbo. Ang panag-uliay sa nasilo nga mga kabubut-on maoy gikinahanglan human sa piniliay.
Ang paghibalik ni Gwen sa Kapitolyo nagpasabot og kausaban. Ang bag-ong napili nga gobernador may hataas nga panglantaw sa maayong kaugmaon sa Sugbo.
Maayo ang agi Gwen kaniadto siya pa ang gobernador. Way katarungan nganong di niya mausab ang kanhi superb performance niya. Daghan ang nagpaabot niini.
Kaming mga magsusulat sa atong dila nahibawo sa iyang pagmithi ug pagmahal sa Sugbuanong kultura ug kabilin. Di tupngan ang iyang pagtagad sa kalambuan niini.
Gani, siya ang responsable nga masuwat ang kasaysayan sa mga lungsod, dakbayan ug lalawigan sa Sugbo. Wa pay probinsiya nga nakasunod sa iyang gibuhat.