SA MIAGING midterm elections niadtong Mayo 13, ang mga miyembro ug opisyal sa Sangguniang Kabataan (SK) non-partisan unta nga pundok, apan subo nga pamalandungon nga gigamit gihapon sa mga politiko ug mga partido sa pulitika.
Sa dakbayan sa Sugbo, dunay isyu bahin sa “vote-buying” sa SK sa Barangay Cogon Ramos. Tinuod o dili kini nga alegasyon apan dunay natanggong sa prisuhan nga mga lider sa SK sa barangay human nasakpan sa kapulisan. Kumusta na ang maong kaso?
Maayong kumustahon usab nato ang tibuok SK sa nasod? Unsay ilang papel sa miaging piniliay. Salawayon o dalaygon ba? Maayong masusi ning sayo pa aron malatid ang mga solusyon nga dili sila maluto sa karaang pulitika ug magiyahan ngadto sa umaabot nga maayong lider sa nasod.
Gisuspenso ang SK sulod sa pipila ka tuig ug bag-o lang gibalik niadtong lokal nga eleksiyon nga gisundan sa midterm elections niadtong Mayo 13.
Di ba gisuspenso tungod sa ilang grabeng pagkalunod sa tradisyonal nga pamulitika? Imbes bansayon unta isip maayong umaabot nga lider sa nasod, nakakat-on na hinuon sa hugaw ug dunot nga karaang pamatasan sa pamutika.
Kon grabe ug halapad gihapon ang pagkagamit sa SK sa pamulitika sa tradisyonal nga politiko, dili kaha maayong suspensuhon og balik? Magpanday og balaudnon nga nag-amendar sa SK ug pulihan kini og laing mas lig-ong kahugpongan sa mga batan-on subay sa kasinatian ug sayantipong pagtuon.
Ang mithi sa pagkatukod sa SK dalaygon ug mabayanihon. Naghatag kini og katungod sa mga batan-on nga mahimong kabahin sa pagdumala sa kagamhanan, gawas nga mabati ang ilang sentimento, maandam usab sila alang sa mas taas nga posisyon sa publiko kon hamtong na.
Dili kita mawad-an og paglaum nga motumaw gihapon ang maayong mga batan-ong lider, ang paglaum sa nasod.