Pagtukod sa multi-level parking nga edipisyo sa Kapitolyo di na madayon

HANAP na karon ang kahigayunan nga matukod ang usa ka multi-level parking building sulod sa Capitol compound, nga maoy gitan-aw nga motubag sa problema sa parking sa maong dapit.

Kini kay dili na kini ipadayon sa administrasyon ni Gob. Hilario Davide III ug itugyan na lang ang desisyon labot niini ngadto kang governor-elect Gwendolyn Garcia.

Matod sa vice chairman sa Bids and Awards Committee nga si Jone Sepe, nga human napakyas ang duha ka bidding ug usa ka negotiated procurement alang sa P91-milyones nga proyekto, kinahanglang moagi na usab kini og laing negosasyon sa mga interesadong supplier.

Apan gipadayag ni Sepe nga tungod sa transition period gikan sa administrasyon ni Davide paingon sa paglingkod na ni Garcia, angayan nga dili na nila ipugos karon ang mga transaksiyon alang niini.

Gawas niini, mapupos usab ang termino sa kasamtangang mga miyembro sa BAC sa Hunyo 30, dungan sa termino ni Davide.

“But since there is already a timing issue, padung na man sa turnover, naa na man ta sa transition phase, kami sa BAC mo-recommend mi sa Office of the Governor nga di na lang ipadayon ang four-level parking at this time,” niingon si Sepe.

Ang gitinguha nga parking building maka-accommodate og 96 ka mga sakyanan.

Si Davide niuyon sa rekomendasyon sa BAC.

Giklaro sa Kapitolyo nga dugay nang nadesisyonan ang dili na pagpadayon sa proyekto ug wa’y kalabutan niini ang suwat nga bag-o lang gipadala ni Garcia, nga nagpahimangno kang Davide nga dili mosulod sa midnight transactions sa nahibiling mga adlaw sa iyang termino.

“I said nga ‘Let’s forego na lang ana. Let the next administration determine kon kinahanglanon ba na or dili,” padayag ni Davide. Di na usab madayon ang pagbaligya sa 14 ka mga luna nga iya sa provincial government nga mokantidad tanan ug dul-an sa tunga sa bilyon ka pesos. (AZLG)