GOBERNADOR Hilario Davide III nabalaka kon unsay dangatan sa mga permanent department head ug mga empleyado nga na-appoint sulod sa iyang administrasyon, karon nga nagdanga-danga na ang paglingkod sa bag-ong gobernador.
Prayoridad lang niya karon nga mapabilin sa ilang trabaho ug dalhon niya sa iyang opisina pagka-bise gobernador, ang kasamtangang 30 ka mga kawani ubos sa Governor’s Office.
Sayod si Gob. Davide nga maapektohan gyud unya sa pag-asumir na ni governor-elect Gwendolyn Garcia ang mga empleyado ug mga department head nga natudlo sulod sa duha niya ka termino.
Lakip sa natudlo isip mga permanent department head ubos sa Davide administration sila si Provincial Disaster Risk Reduction and Management Officer Baltazar Tribunalo, Cebu Provincial Anti-Drug Abuse Office (Cpadao) Ivy Durano-Meca, Provincial General Services Officer Jone Sepe, Provincial Engineer Hector Jamora ug Provincial Agriculturist Roldan Saragena.
Natudlo sab isip permanent assistant department heads panahon ni Davide silang Dr. Rene Catan sa Provincial Health Office ug Rodel Bontuyan sa Provincial Environment and Natural Resources Office.
Makigtagbo si Davide sa maong mga opisyal ug sayran ang ilang mga plano labot sa posibleng pagpabilin o kaha pagbiya sa ilang pwesto, karon nga duna nay bag-ong gobernador.
“Ako pa pud sila nga i-meet to ask them unsa sa’y ilang huna-huna, unsay ilang plano pud kay definitely maapektohan sab gyud sila. I’m sure Governor Garcia will have her own appointees pud to positions diri sa executive building,” sigun ni Davide.
Nasayran nga dunay mga empleyado sa Kapitolyo kansang kontrata kutob na lang karong Hunyo 30. (AZLG)