KINALIT nga drug test sa mga trabahente ang giawhag sa kapulisan ngadto sa mga construction firm ug mga tag-iya og mga establisemento nga padayon pa gitukod.
Kini human nga nabantayan sa kapulisan sa Mandaue City nga kasagaran sa mga masikop, ilabi na diha sa mga checkpoint nga ipahigayon sa nagkadaiya nga police station, mga construction worker ang makuhaan og pinakete sa ginadili nga drugas.
Human nga kasagaran sa masikop nga manggamitay og shabu, mga nagtrabaho sa construction.
Ang siyudad sa Sugbo, Mandaue City, Lapu-lapu City ug silingang’ syudad ug mga lungsod ang nagkadaghan ang construction industry.
Niadto lang Huwebes ug Biyernes sa gabii nga gipahigayon nga checkpoint sa kapulisan sa Centro Police, diha sa may dan A. Soriano sa Barangay Centro sa Mandaue, sa 13 nga ilang nasikop, katunga niini nagtrabaho sa usa ka construction company.
Kini ang giangkon ni Police Major Aldrin Villacampa, ang hepe sa Centro Police.
Matud ni Mandaue City Police Office director, Police Colonel Julian Entoma nga nasuta nga halos kada katapusan sa semana mao usab ang tingsweldo sa mga construction worker.
Sa mga nasikop duha lang niini ang taga Mandaue City, ang 11 taga Lapu-lapu, lungsod sa Consolacion ug lungsod sa Liloan.
“Bisan sa weekdays naa ta madakpan sad nga manag-motor or sakay taxi, naay foreman, welder, panday, uban gikan hithit magdala pa gyud og balon, ang uban namaligya na gyud,” gitug-an ni Villacampa.
Giingon nga niangkon ang mga dinakpan, nga gikan sila sa dakbayan sa Sugbo, nihithit og shabu, sa barangay Pasil, Tejero, Ermita ug Duljo Fatima, ang uban ang magbitbit pa og duha ngadto sa unom ka sachet, isip balon ug uban ang ibahin sa ubang kaubanan nga trabahante.
Matud ni Villacampa nga bisan sila ang kanunay na nga mopahinumdom sa mga manager sa construction company nga mas maayo nga dili lang sa pag-apply apan matag human tulo ka bulan himuon ang surprise drug test, pagsiguro nga drug-free ang maong trabahuan.
Andam usab sila sa mga pulis ang mohimo og pag-lecture sa mga trabahante, kon mopadala og sulat hangyo kanila ang mga construction firm o kompanya, kalabot sa pagpasabot ug pagpahimangno kanila sa mga kadaot nga dala sa drugas.
Usa sa paagi kini aron pag-menus sa demand sa ilegal nga drugas, kay, pasabot ni Entoma nga bisan og kapila ug unsa nga mga operasyon ang himuon sa kapulisan, kon aduna gihapon demand sa mga manggamitay, magpadayon ang pagbaligya sa ginadiling’ drugas.