GIPADAYAG ni Lapu-Lapu City Mayor-elect Junard “Ahong” Chan nga dili angayang mabalaka ang mga job order ug casual nga mga empleyado sa Lapu-Lapu City Hall sa higayon nga siya na ang molingkod nga mayor sa dakbayan karong Hunyo 30.
Kini gumikan kay silang tanan ipaubos ni Chan sa performance assessment aron masuta kung kinsa gayud ang adunay tiunay nga buluhaton sa city hall.
Human sa performance assessment, dinhi na matod pa, siya modesisyon kung angayan ba nga ipabilin ang naasoyng mga empleyado o dili.
Laing basehanan unya ni Chan sa iyang pagpili sa mga angayang magpabilin sa city hall mao gayud ang wala pag apil-apil sa usa ka empleyado sa dagan sa politika niadtong nagsingabot pa ang piniliay.
Dugang ni Chan nga tanang JO ug casual nga mga empleyado subject gayud sa iyang himuong performance assessment.
Bisan ang mga regular o permanent nga mga empleyado apil usab niini bisan dili kini niya mahimong mahilabtan o mataktak.
Lakip sa ipaubos sa performance assessment mao ang mga empleyado sa city hall nga mga Persons With Disabilities (PWDs) hilabi na nga usa kini sa iya unyang tagaan ug prayoridad nga makatrabaho sa iyang administrasyon.
Gihimikak usab ni nga Chan nga adunay usab siyay mga tawo nga gisugo sa paghulga sa mga kasamtangang empleyado sa city hall sama sa paghulga kanila sa pagpamutos na daan samtang wala pa siya molingkod sanglit sayod siya nga dili kini maayo.
Iya usab gisalikway ang mga tawo nga nagsuroy-suroy sa mga balay patigayon sa dakbayan nga mangayo ug salapi gamit ang iyang pangalan sanglit wala gayud siyay gisugo kalabot niini.
Iyang giawhag ang mga gisuwayan ug duol niining mga tawhana sa pagkuha ug hulagway sa nagpailang iyang sakop ug isumbong kaniya pinaagi sa Facebook page .
“As long as dili sila actively nag campaign against nato kay maka demoralized man sad na sa atoang mga dumadapig nuh nga sila grabe nilang attack nato unya na retain sila ang ato lang kung nag focus lang sila sa ilang trabaho wala sila mag apil-apil sa politika we can assure them,” matod ni Chan sa Superbalita Cebu.
Si Chan nisakmit sa renda sa kagamhanan sa dakbayan sa Lapu-Lapu nga gihoptan sa pamilyang Radaza human sa miaging mid-term elections niadtong Mayo 13 ning tuiga. (GCM)