NIKABAT sa 22 Pantawid Pamilyang Pilipino Program (4Ps) ka paresan sa lungsod sa Loon, Bohol ang ningpaubos sa free mass civil wedding niadtong Abril 30, 2019.
Ang libre nga sibil nga kasal gipasiugdahan sa Municipal Government of Loon pinaagi sa Municipal Social Welfare and Development Office (MSWDO) uban sa DSWD-7 staff nga nadistino sa Loon nga 4Ps Municipal Link (ML) ug ang Social Welfare Assistant (SWA).
Lakip sa 22 4Ps nga magtiayon mao sila si Baltazar Arao ug Edesa Ocat nga taga Barangay Napo, Loon nga nag-ipon na sulod sa 19 ka tuig.
“Daghan ming nasugatan nga mga problema isip manag-pares pero kung magsinabtanay lang ug adunay gugma sulod sa pamilya, makaya ra gayud ang tanan,”paambot ni Edesa, namaligya og isda sa merkado samtang si Baltazar usa ka mangingisda.
Ang magtiayon naluwas sa kusog nga linog nga 7.2 magnitude nga niigo sa Bohol niadtong Oktubre 15, 2013.
“Sama sa linog nga nitay-og sa among balay, ang mga problema ug pagsulay sulod sa pamilya dili gyud malikayan. Mag-away ming duha pero kung kinsa ang nasayup mao ang una nga mangayo pasaylo aron dili na kini mudako pa,” dugang ni Edesa.
"Tungod pud sa Family Development Session (FDS) sa Pantawid nakakat-un sad mi og mga pagtulon-an kung unsaon pagdala sa pamilya labi na nga gapadako mi og lima ka mga anak,” dugang niya.
Ang unang tulo ka mga bata monitored under 4Ps mao s ila si Kaye April, (17; Kyla Arianne, 15; Kepler Adrianne, 14; ug duha ka manghod nga sila si Keannan Angelo, 8; ug Karl Anthony, 5.
Si Baltazar kanunay nagtambag sa mga anak bahin sa pagtuon.
“Kung makakita sila sa ilang pares puhon, piliun nila ang adunay maayung pamatasan ug respetuhon sila,” matod ni Baltazar. (Tampo)