Operasyon sa Consolacion landfill gipahunong

GIPAHUNONG sa Environmental Management Bureau (EMB) 7 ang operasyon sa usa ka sanitary landfill sa Polog, Consolacion human kini napamatud-an nga nakalapas sa balaod.

Ang Asian Energy Systems Corp., giluwatan sa EMB 7 og cease and desist order (CDO) tungod sa kalapasan niini sa environmental laws.

Nakalapas ang maong kompaniya sa Presidential Decree 1586 o ang Philippine Environmental Impact Statement System ug sa Republic Act 9275 o ang Philippine Clean Water Act of 2004.

Base sa findings sa gihimo nga inspeksyon sa sakop sa EMB 7 sa AESC niadtong Abril 23 ug Mayo 5, wala napatuman sa maong sanitary landfill and Environmental Management Plan (EMP) nga niresulta sa pagdahili sa dapit niadtong Mayo 4.

Ang EMP usa ka kondisyon nga nasukip sa Environmental Compliance Certificate (ECC) nga giisyu sa kompaniya niadtong Pebrero 10, 2010.

Nilapas na kini sa wastewater effluent standards alang sa Checmical Oxygen Demand (COD), Ammonia, ug sa coliform parameters.

Tungod niini, nakalapas sila sa condition 5 sa ilang ECC ug sa Philippine Clean Water Act.

And CDO gipahamtang sa maong kompaniya niadtong Mayo 7 diin gihimo usab ang technical conference niadtong Mayo 8.

Gawas sa CDO, gipabayad usab ang AESC og P100,000 isip multa sa ilang kalapasan.

Isip parte sa pasalig sa maong kopmaniya nga masulban ang problema, gihatagn og 15 ka adlaw ang AESC aron mosumiter sa ilang rehabilitation plan sa landslide area.

Kinahanglan usab sila nga mopatuman og kinatibuk-an nga rehabilitation ug assessment sa apektado nga dapit.

Gimandoan usab ang maong landfill nga di na modischarge sa ilang wastewater ug tabunan ang mga liki.

Aduna’y laing re-inspection ang pagahimuon sa EMB 7 aron pagsuta og nituman ba ang maong kompaniya.

Kon magpadayon gihapon ang maong landfill sa ilang operasyon, aduna’y multa nga P50,000 ang ipahamtang niini matag adlaw.

Si EMB 7 Regional Director William Cuñado nibutyag sa Superbalita Cebu nga pipila sa local government units nga maglabayay sa maong landfill ang dakbayan sa Sugbo, Mandaue, Lapu-Lapu ug ang lungsod sa Consolacion.

Karon nga abli na ang landfill sa Barangay Binaliw, Cebu City nga gidumala sa ARN Builders Inc., mamahimo nga molabay ang LGUs sa maong bag-ong landfill karon nga gihunong pa ang operasyon sa AESC.

Dugang ni Cuñado nga wala sila makadawat og reklamo sa mga residente nga daw gibahoan sa maong landfill apan ilaha kining sutaon og magpadala silag tawo sa dapit.

Daghang concerned ang nipadayag sa ilang nabalaka karon nga mabalda usab ang koleksiyon sa mga basura labina nga pipila ka lokal nga kagamhanan sa Metro Cebu dunay transition sa administrasyon. (HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph