Kanhi ahente sa CIDG 7 gitipi

NAHAGBA SA TAXI: Si P/Captain Delfin Bontuyan, kanhi sakop sa Criminal Investigation and Detection Group (CIDG) 7, nagsakay sa iyang motorsiklo nahagba sa kilid sa taxi dihang gipusil-patay sa mamumuno nga nagsakay usab og motorsiklo sa St. Pope John Paul II Ave., Barangay Mabolo, dakbayan sa Sugbo kagahapon sa hapon, Mayo 21. (Nicko Tubo)
NAHAGBA SA TAXI: Si P/Captain Delfin Bontuyan, kanhi sakop sa Criminal Investigation and Detection Group (CIDG) 7, nagsakay sa iyang motorsiklo nahagba sa kilid sa taxi dihang gipusil-patay sa mamumuno nga nagsakay usab og motorsiklo sa St. Pope John Paul II Ave., Barangay Mabolo, dakbayan sa Sugbo kagahapon sa hapon, Mayo 21. (Nicko Tubo)

GIPUSIL-patay ang kanhi sakop sa Criminal Investigation and Detection Group (CIDG) 7 nga si P/Capt. Delfin Bontuyan sa duha ka mga lalaki nga nagsakay og motosiklo sa St. Pope John Paul II Avenue, Barangay Mabolo, siyudad sa Sugbo alas 2:30 sa hapon sa Martes, Mayo 21.

Si Bontuyan gikan nitambong og hearing sa RTC Branch 13 sa kasong ilegal nga drugas batok kang Rey Niones ug padulong na kining mopauli sa ilang balay sa Barangay Talamban.

Usa sa mga kauban ni Bontuyan kaniadto sa CIDG-7 mitug-an sa Superbalita Cebu nga human sa hearing, nagdali ni nga milakaw sakay sa iyang motorsiklong Yamaha Nmax.

Apan pag-abot sa eskina sa A. Soriano St. ug St. Pope John Paul II Ave., nihunong sa stop signal nga nagsunod na kaniya ang duha ka motorsiklo nga pulos XRM nga adunay tag duha ka sakay niini nga pulos naka-full face helmet.

Sa dihang padulong na nga mo-go ang traffic light, gipusil makadaghan sa mga nagmotorsiklo si Bontuyan sa luyo nga bahin niini samtang ang usa ka motorsiklo nilipot kini sa tuong kilid sa taxi ug gitiwasan si Bontuyan.

Ang drayber sa Niñal Taxi nagkanayon nga sa pagkadungog niya sa butobuto sa armas, iya dayong gipahigda ang iyang lingkuranan sa kahadlok.

Diha sa iyang walang kilid ang motor ni Bontuyan ug iyang nakita ang mga tawo nga namusil apan dili na niya maklaro ang mga panagway.

Human sa pagpamusil, naatol usab nga go signal na ang traffic light ug ang mga tirador dali kini nga mipadagan paingon sa simbahan sa Mabolo.

Wala pa masayri pilay igo sa lawas ni Bontuyan apan makita sa iyang likod ang mga buslot sa jacket ug sa iyang bukobuko ug agtang.

Sa paghiling sa iyang pantalon, nakuha sa mga sakop sa Scene on the Crime Operation (Soco) ang P30,000 sa iyang bulsa ug usa ka calibre 22.

Matod ni P/Captain Miles Damoslog, deputy chief sa Mabolo police, nga sa inisyal nga nakuha sa SOCO adunay 11 ka basiyo sa bala sa wala pa matino nga kalibre sa armas.

Sa pagkutlo ning balita wala pa silay matan-aw nga motibo kung may kalabutan ba kini sa iyang trabaho.

“Lahat ng angulo ang tinitingnan muna natin,” matod ni Damoslog.

Niadtong 2016, atol sa paglingkod sa katungdanan ni President Rodrigo Duterte, gibalhin si Bontuyan sa Luzon, apan gilabay na usab siya sa Autonomous Region in Muslim Mindanao (ARMM).

Si P/Col. Royina Garma, hepe sa Cebu City Police Office (|CCPO), nagkanayon nga padayon pa ang gihimong imbestigasyon sa Mabolo ug dili pa sila makatumbok unsay motibo sa krimen.

Apan matod niya nga sa dihang nahimo siya nga hepe sa CIDG-7, wa na niya maabti si Bontuyan sa maong buhatan.

Aduna siyay nakita nga mga dokumento sa mga kaso sa illegal nga drugas nga gihuptan si Bontuyan nga gi-dismiss sa korte.

Ipasusi usab ni Garma sa imbestigasyon kung aduna bay nakontra si Bontuyan sa iyang pagka pulis sa dihang sa CIDG 7 pa kini nadestino lakip na ang mga kaso nga iyang gihuptan.

Ang anak ni Bontuyan nga si Christine Claire, Sanguniang Kabataan chairman sa Barangay Talamban, dili makatuo sa panghitabo.

Ang nahitaboan atbang lanbg sa police station sa Mabolo. Matod ni Damoslog, dali sila nga niresponde sa alarma apan wa na maabti ang mga tirador.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph