DAGHANG anggulo ang gisubay karon sa Police Regional Office (PRO)-Central Visayas sa pag-ambush-patay kang Police Captain Delfin Bontuyan sa A. Soriano Street corner Saint John Paul II Avenue, Barangay Mabolo, Dakbayan sa Sugbo kaniadtong Martes, Mayo 22.
Matud ni Police Brigadier General Debold Sinas, hepe sa PRO-Central Visayas, nga usa sa ilang gitan-aw ang may kalabutan sa ilegal nga drugas human matud pa napalagpot kini sa Criminal Investigation and Detection Group-Central Visayas ug gilabay sa Cordillera Administrative Region niadtong 2016 atol sa paglingkod sa katungdanan ni President Rodrigo Duterte.
Gitug-an ni General Sinas nga nalakip siya sa listahan sa mga Narco cops ug Ninja cops diin ang modus niini mao ang pagprotektar sa mga drug personalities ug mo-recycle sa mga nasakmit nga ilegal nga drugas.
Apan kining tanan wala sila'y nakuhang ebidensya atol sa gihimong imbestigasyon sa mga sakop sa Regional Internal Affairs Service-Central Visayas.
Nagduda hinuon ang heneral nga mga drug personalities ra usab ang nag-ambush kang Bontuyan sa pagtuo nga daghang mga kaso niini nga nabiyaan ug gisaaran sa biktimang pulis nga maabswelto sa ilang kaso.
Ipasusi usab ni General Sinas nganong naa dinhi sa Sugbo si Bontuyan nga unta didto kini sa iyang mother unit bisan pa man nga aduna kini kaso nga gitambongan sa korte.
Naka-full-alert pa ang Philippine National Police lukop nasud tungod naa pa kini sa election period.
Gisalikway usab sa PRO-Central Visayas Director ang pasangil ni outgoing Cebu City Mayor Tomas Osmeña nga aduna'y bahid sa politika ang kamatayon ni Bontuyon tungod ang anak niini nga Sangguniang Kabataan Chairman sa Barangay Talamban hugot nga misaway sa pagpang-harass sa kapulisan atol sa nagsingabot ang eleksyon.
Sa post sa mayor sa iyang Facebook page daw sa gidudahan niini ang police nga maoy nagpaluyo sa kamatayon ni Bontuyan.
Matud ni Sinas nga naanad na sila sa pag-atake sa mayor ngadto sa kapulisan apan natingala lang kini nganong didto molaban si Mayor Osmeña sa mga pulis nga aduna'y kadudahan nga record apan sa mga pulis nga mamatay ug masamdan sa lihitimo nga operation wala kini mosimpatiya.