GIANGKON ni former World Boxing Council 108-lb Champion-turned trainer Rodel Mayol nga ang 8th round knocked down (KD) score ni Romero “Ruth” Duno batok kang Juan “Zurdo El Mozo” Rodriguez niadtong Huwebes, Mayo 23, ang nahimong likuanan sa kadaugan sa iyang boksidor.
“O pildihinon si Romero (Duno) ato maayo kay na KD sa ika-8 pero daghan man gud sayup ang referee,” batbat ni Mayol sa Superbalita Cebu via online chat. “Dapat knockout to ang kontra pero giingon nga naa head butt mao nga nibase sa scorecard.”
Gihulagway ni Mayol si Rodriguez nga beterano kaayo moaway hinungdan nga gibagti siya'g kabalaka apan hinuon misalig sab siya sa kalig-on, kakusog ug kaisog sa boxer nga lumad taga Dabayan sa Cotabato nga si Duno.
Sa grado nga 1 - 10, 7 ang gihatag ni Mayol sa performance ni Duno, sanglit matud pa niya nga daghan pa kaayo og kuwang aron mamahimung usa ka banggiitang future champion si Duno.
“Sunoy pa, kuwang pa iyang timing sa suntok, head movement ug footwork, daku pa kaayo siya og trabahuon kay iyang division daghan og mga maayong laki nga Boxers,” segunda ni Mayol.
Gipasalatan ni Mayol ang Wildcard boxing gym ni coach Freddie Roach nga mao'y gigamit sa Team Duno training. Dako usab natabang ang training staff ni Mayol nga sila si Stanley Godinez, Ernel Fontanilla ug Searge Ramirez sa pagtinabangay sa pag-training.
Milupad na kagahapon si Duno balik sa Pilipinas uban sa kadagkuan sa SanMan Promotions nga sila si CEO JC Manangquil ug President/Manager Dexter Tan. (Daniel Quindao Guden, US Correspondent)