NAGDUDA ang hepe sa Police Regional Office(PRO)-Central Visayas kang outgoing Cebu City Mayor Tomas Osmeña nga protector kini sa mga pulis nga nalambigit sa ilegal nga drugas human matod pa mipasangil kini nga ang pulis ra ang nag banhig patay kang Police Captain Delfin Bontuyan.
Gisalikway ni PRO-Central Visayas Director Debold Sinas ang pasangil ni Mayor Osmeña nga adunay bahid sa politika ang kamatayon ni Bontuyan tungod ang anak niini usa ka Sangguniang Kabataan chairman sa Barangay Talamban.
Ang anak ni Bontuyan giingong hugot nga misaway sa pagpang harass sa kapulisan atol sa nagsingabot ang eleksyon niadtong Mayo 13.
Sa post ni Osmeña sa iyang Facebook page, usa daw sa gidudahan niini ang pulis nga maoy nagpaluyo sa kamatayon ni Bontuyan.
Matod ni Police Brigadier General Sinas nga kung ang mayor mipasangil sa pulis nga maoy nagpatay kang Bontuyan, mahimo usab nga mopasangil sila kang Osmeña nga protector sa mga pulis nga nalambigit sa ilegal nga drugas bisan pa man nga wala pa silay ebedensya sa maong pulis.
“Now as to the allegations of the mayor nga pulis ang nagpatay, ngano man nga i-estorya niya nga pulis? ...kung tinuod nga involve sa drugs to si Captain Bontuyan, protector siya (Osmeña) sa drugs, total he already made kami pud mohimo pud mig kaugalingong assessment,” matod ni Sinas.
Iyang giangkon nga ang pagkalambigit ni Bontuyan sa illegal nga drugas wala pa silay ebedensya niini, gani gipaubos pa kini sa imbestigasyon.
Nakasaway siya sa pamahayag sa mayor nga namasangil na kini dayon bisan pa man nga wala pa kini ebedensya nga gihuptan.
Naanad na hinuon kini sa pag atake sa mayor ngadto sa kapulisan apan natingala lang kini nganong didto molaban si Osmeña sa mga pulis nga adunay kadudahan nga record, apan sa mga pulis nga mamatay ug masamdan sa lihitimo nga operasyon wala kini mosimpatiya.
Gitawag ni Sinas ang mayor nga usa ka mananagna.
“Ang iyang adtoan lang nga mamatay nga pulis kato lang mga suspected na nangahawa diri because naay related sa drugs, kanang among mga pulis nga nangamatay diha wala gyud siya mibisita, wala mo maka matikod? Mao tong iyang pamisitahon kadtong mga pulis nga nangamatay nga dili naman assign diri sa region nga questionable naman ang character,” matod ni Sinas.
Dali nga miadto ang mayor sa crime scene uban sa iyang anak nga si Miguel apan wala na niya maabti pa ang patay’ng lawas ni Bontuyan. (Superbalita Cebu)