NAKAHATAG reaksyon si kasamtangan Kongresista Peter Unabia sa mga Facebook post ni abogado Ernesto Sotto, kinsa kasamtangan nga provincial board secretary.
Kahinumduman niadtong adlaw’ng Lunes, Mayo 20, ang mga Facebook post ni Sotto human sa piliay maoy gibasihan ni Board Member Bebing Dumadag nga moduso og resolusyon ngadto sa sesyon aron ideklarar nga persona non-grata si Sotto.
Kini tungod sa mga sakit nga pulong batok sa taga Misamisnon nga gitawag niining “puta” human sa eleksyon.
“Most Misamisnons are whores who spread their legs to the highest bidder. Sa Tagalog pa kayo ay mga p***,” tipik sa post niini.
Gibutyag ni Dumadag sa maong resolution nga malisyoso kaayo ang pamahayag niini nga direkta sa katawhan sa Misamis Oriental ug ngadto mismo sa napili pagka-kongresista sa unang distrito nga si Christian Unabia.
“You will never get my respect as a congressman. You won because of money and not your qualifications,” post ni Sotto.
Aduna usab post niini nga “Drug money wins.”
Taliwala walay ginganlan niini nga post apan gituohang daw gikasakit niini ang pagkapilde sa iyang gidapigan nga kandidato nga kaatbang ni Unabia nga si kasamtangan Bise Gobernador Joey Pelaez.
“The malicious and defamatory statements made by Mr. Sotto are patently conduct unbecoming and is not permissible act of a government employee,” anaa nakalatid sa resolution.
“While Mr. Sotto who is from Albay and definitely not a Misamisnon and being a stranger, he should have been extra cautious in his language and more circumspect deserving to be called a government employee and a former seminarian,” dugang ni Dumadag.
Si Eric Khu lakip sa mikwestyon nganong wala sab kini tunga-tunga sa sesyon isip board secretary nga daw sweldado kini sa gobyerno hinuon nipasabot nga hatagan kini og higayon nga motubag.
Sa iyang bahin ni Board Member Vincent Pelaez, kinsa maoy nag-preside niadtong adlaw’ng Lunes nga sesyon, nipasabot nga ila pa kining tun-an usa hatagan og gibug-aton ang maong resolution usa ipatuman.
Aminado kini nga dili maayo nga pulong alang sa Misamisnon nga tawagon ug puta ug miingon nga dili pa usab sigurado kon kang Sotto ba gyud ang maong account.
“Dili man proven kung iya tong account pero granting nga iya to, sigurado ako nga naa siya’y kasaypanan ngano iya tong gihimo sa katawhan sa Misamis Oriental tungod lang kay napildi ang tawo nga iyang gisuportahan,” pasabot ni Pelaez.
Ang maong resolution gitakdang iduso sa Civil Service Commission, local chief executives sa siyudad ug kalungsoran lakip kabarangayan.
Wala pa mihatag og reaksyon si Sotto hangtod ning panahona apan mismong si Congressman Peter Unabia mihatag hinuon og reaksyon sa mga pamahayag ni Sotto nga dako og pagtoo nga ang mga post direkta ngadto sa iyang anak nga si Christian.
“Sakit kana iyang mga pulong, being professional dapat wala kana niya na buhata. Basin nasakitan lang siya sa kaparotan sa iyang gidapigan,” matud ni Unabia.
Gihimakak sab ni Unabia nga gitawag niining black propaganda batok kaniya nga nalambigit sa druga.
Gibutyag niini nga limpyo ug gikan sa ilang mga negosyo ang pundo nga gigamit sa eleksyon.
Matud sa kongresista nga dili na unta angayan niya nga kwentahon apan daw sa litson manok lang nila nga negosyo mokita na sila og gibana-banang P18 milyon ngadto P20 milyon matag bulan gikan sa 600 kapin ka mga litson manok outlet sa tibuok Pilipinas.