UGDAW ang munisipyo sa lungsod sa Sugbongcogon, human gilamoy sa kalayo nga nagsugod alas 8:45 Martes sa gabii, Mayo 21.
Si Sugbongcogon Vice Mayor Derrick Lagbas nisulti nga tanan buhatan walay nahibilin nga mga kabtangan atol sa pagkasunog gumikan kay nataod-taoran ang pagresponde sa kasikbit nga mga bombero sa dapit.
Kini gumikan kay ang mismong fire truck sa maong lungsod ang wala kadagan tungod kay adunay piyesa nga kulang ug wala pa matul-id.
Dugang niini nga wala pay insakto nga report ang buhatan sa Bureau of Fire Protection apan gituohan nilang nagsugod ang kalayo sa bodega sa munisipyo sa unang floor tapad sa buhatan sa Municipal Development Social Welfare Office.
Sulod sa bodega nagkadaiyang gamit ug nanganlan niini ang mga pintal ug uban pa.
Dugang sa bise mayor nga dili pa niya matubag ang mga hungihong nga posibleng gituyo pagsunog ang munisipyo labina ning nagpadayon pa ang imbestigasyon.
Lakip sa naugdaw ang mayor’s office ug tanan buhatan sa munisipyo, gani gitouhang nalakip ang kinitaan sa koleksyon sa ilang mga tourism site sa lungsod.
Si Mayor Mildred Lagbas-Mondigo, kinsa wala sa lungsod atol sa pagkasunog kay nagpacheck-up, niingon nga buot niyang paimbestigahan nganong wala nakadagan ang fire truck niadtong tungora. Unta kung adunay kulang nga piyesa magpahibalo kanila aron ilang maabagan taliwala paman national ang budget niini.
“Ato kanang paimbestigaran atong patubagon unsa ni kahitabo nga makatabang kita sa pagresponde sa uban lungsod unya sa atong kaugalingon nga lungsod wala na hinuon,” dismayadong pahayag niini.
Hinuon gimando niini ang tanan nga mga empleyado sa munisipyo nga magtrabaho ug magpadayon sa ilang transaksyon sa municipal gymnasium.
“Padayon lang gihapon ta sa transaksyon. Nangayo ta sa depensa sa atong katawhan sa lungsod nga bisan medyo bikil kay wala gyud tay magamit kay naapil gyod kasunog lakip gani mga computer,” matud niini.
Nagpasalamat sab kini sa mga fire truck gikan sa nagkalain-laing lungsod sama sa Salay, Lagonglong, Balingoan, ug Talisayan nga miresponde taliwala nga wala na masalbar ang munisipyo gumikan kay sa tabang sa mga bombero wala na malakip ang mga kabalayan nga duol sa munisipyo.
Nanawagan ang kagamhanang lokal sa Sugbongcogon nga unta matabangan sila sa national nga sa dili madugay makatukod og balik og munisipyo nga taod-taod na nga giplano sa pamunoan ni Mondigo.
Sa iyang bahin ni BFP-Northern Mindanao director Lindy Lauzon, gibutyag niini nga unta leksyon kini sa mga munisipyo sa kalungsoran nga motuman sa mga fire safety code hilabina nga daw daghan ang wala mituman niini.
Samtang si Misamis Oriental Governor Bambi Emano atol sa pagkasunog, nimando sa buhatan sa Provincial Risk Reduction Management Department nga motabang ug moayuda sa mga nag-unang panginahanglan sama sa relief goods.
Gitun-an sab niini kung unsay matabang sa lalawigan alang sa pagpabarog sa munisipyo.
Nanawagan sab kini sa katawhan sa lalawigan nga magbinantayon labina ning sobrang gakasinatian ang labihan kainit sa panahon.
Nasayran nga gama sa mga uga nga materyales ang munisipyo ug ila kining gikonsidera nga dako og sentimental value kay natukod kini tuig 1963.