GI-AGHAT sa usa sa mga nitahan balik sa gobyerno ngadto sa mga kanhi kauban niini ug sa mga kabatan-onan nga dili magpa-ilad sa mga pasalig sa New People’s Army (NPA).
Usa si Alyas Jojo, 27, taga Claveria, Misamis Oriental sa 26 ka mga nakapahimulos sa programa sa gobyerno ilabi na ang Enhanced Comprehensive Local Integration Program (E-Clip).
Gibutyag ni Jojo kinsa nagsugod sa dihang nag-edad og 22 pa ug lima ka tuig nga nagtago-tago sa kabukiran nga lisod ang kahimtang sa bukid.
“Gahawid ko og armas sulod sa lima ka tuig, ako lang napag-isipan nga mo surrender ko tungod kay sayop na ang among gihimo, daghan na nawad-an nga panginabuhian nga mga civilian, mag-uuma tungod sa pag organize namo, mainitan sila sa mga army,” matud ni Jojo.
Gi-aghat pa niini ang mga kauban nga wala pa nibalik sa gobyerno nga unta makahuna-huna kini sama kaniya nga motahan na lamang aron mapahimoslan ang programa sa gobyerno.
“Mao nang naka ana ko nga wala man ni pulos nga kinabuhi ni mao nga nakadumdom gyud ko og balik sa gobyerno, gi-aghat unta nako nga pareha unta sila sa akoa nga nakadumdom di gyud magpa-ilad sa doktrina sa NPA, kay di gyud basta-basta ang doktrina sa NPA, mailad gyud ka og magpakamatay pa ka kung mailad gyud ka sa doktrina sa NPA. Dapat lang magbalik sa gobyerno ang akong mga kauban,” dugang niini.
Gibutyag usab ni alyas Jeric, kinsa naigo sa bala sa kalibre 60 nga armas samtang nakiggubat sa gobyerno rason nga dili na makalakaw, nga nitahan kini tungod na usab kay gikapoy na kini sa kabukiran ug wala nay plano nga mobalik isip NPA.
“Naigo sa 60, tungod sa panaad sa mga NPA nga kami tabangan kung unsay mahitabo na karon wala na napasagdan mao ni surrender gyud ko nibalik ko sa sabakan sa gobyerno,” matud ni Jeric.
Samtang laing kanhi sakop sa rebelde usab niingon nga kontento na kini sa ayuda ug tabang gikan sa gobyerno lakip na mga programa ug dakong kantidad nga gitunol kanila.
Gipasalig usab sa lokal nga kagamhanan sa siyudad ug kasundalohan nga tabangan ug suportahan ang mga boluntaryong mobalik sa gobyerno. Andam usab ang kasundalohan sa paghatag og proteksiyon ngadto na kanila.