NAGPASALAMAT ang pamilya sa 26 ka mga kanhi sakop sa New People’s Army (NPA) nga nakapahimulos sa programa sa gobyerno niadtong Martes, Mayo 21, sa Barangay Mambuaya, dakbayan sa Cagayan de Oro.
Kini nga programa mao ang Enhanced Comprehensive Local Integration Program (E-Clip) sa dakbayan sa Cagayan de Oro alang niadtong mga boluntaryong nibalik na sa gobiyerno.
Matud ni Allan Porcadilla, focal person sa E-Clip, nga kini nga programa wala naglakip niadtong mga nadakpan.
“Bulahan kaayo ta kay supportive kaayo si Cagayan de Oro (City) Mayor Moreno, tabangan pa gyud nga makabalhin sila sa relocation site nga subdivision nga gihatag sa National Housing Authority, tanang ayuda nga pweding mahatag sa atong FR gusto ni mayor mahatag gyud sa ila,” matud ni Porcadilla.
Una nga gipahigayon ang medical mission aron makita kung unsa ang angay nga mahatag ug masusi ang panglawas sa maong mga surrenderer, diin buot silang mahatagan una og saktong edukasyon ug isunod ang ilang panginabuhian.
Gibutyag sa asawa sa usa sa mga benepisaryo nga malipayon siya nga ninaog na gikan sa kabukiran ang bana gumikan kay dili na kini mabalaka ug gani nakahuman na sa high school ang usa sa pito ka mga anak.
“Lisod kaayo nga wala siya, gakabalaka gyud ko, giingnan nako nga mo surrender, sauna mahadlok gyud mi makakita mig sundalo,” butyag niini.
Ang kasundalohan gikan sa 65th Infantry Battalion ang nag-atiman ug nagprotektar sa mga kanhi rebelde.
Naghatag og libreng alot, masahe, pagpadula ug nagpa boodle fight pa human sa maong medical mission.
Nasayran nga nagagikan ang mga nitahan sa Besigan, Dansolihon, Tignapoloan ug naa say nitahan nga gikan sa Opol, Baungon ug may Talakag lakip na dunay nitahan usab nga gikan sa Surigao nga buot motahan sa siyudad gumikan kay nakita niini ang programa sa dakbayan.
Gitakdang tukoran og mga panimalay ang nitahan sa gobyerno diin gitagan-an og P5 milyones nga budget gikan sa nasyonal nga gobiyerno.