ANG Police Regional Office 7 miklaro nga wa sila moingon nga posibling buhi pa si Franz Sabalones human wa motakdo ang fingerprint niini nga ilang gitandi sa records sa Commission on Elections (Comelec) sa San Fernando, Cebu ug sa lawas niini sa siyudad sa Quezon.
Di conclusive ang resulta sa wa pagtakdo sa fingerprint ni Sabalones sa iyang record sa Comelec ug fingerprint sa lawas niini.
Matod ni P/Brig. Gen. Debold Sinas nga mahimong sayop nga fingerprint ang nabutang sa Comelec records hinungdan nga wa motakdo.
Tungod niini, modangop sila sa scientific nga pamaagi sa pag double check sa usa ka lawas pinaagi sa DNA test sa amahan o kaha anak ug igsuon ni Franz Sabalones.
Naglisod sila sa pagkuha niini tungod kay wa na kini makita sa San Fernando.
Hangtod karon anaa pa sa usa ka punerarya sa Dakbayan sa Quezon ang lawas ni Sabalones sud na sa kapin usa ka buwan.
Sigun sa balaod nga kon ang usa ka lawaw di i-claim sa kabanay sulod sa 60 ka adlaw, gobyerno na ang mopalubong tungod kay makahatag kinig peligro sa panglawas sa tawo.
Awhag niya sa mga kabanay ni Sabalones nga mopatim-aw ug mopaila nga sila ang direktang pamilya ni Franz ug mopakitag dokumento pagmatuod nga kabanay sila ug ipaubos dayon sila sa DNA examination.
“We informed nga katong cadaver wa pa gi claim. As far as we know kami I already talked to our legal the cadaver should be there only up to 60 days. After 60 days, I think there is a law that they will be buried for health reason. Kon naa may mga pamilya nga naminaw, you have 60 days to claim it,” matod ni Debold Sinas.
Una nang nagduda ang kapulisan sa Central Visayas kon tinuod bang si Sabalones ang napatay sa kaulohan human nga wa mopatim-aw ang igsuon ug ang mga ginikanan sa punerarya.