Tubid, Nabong gisuspenso, gipamulta

GIPANGSUSPENSO og tulo ka mga duwa unya gipamulta og P75,000 sila si Ronald Tubid ug Kelly Nabong gumikan sa ilang kalambigitan sa Spiderman nga insidente nga nakasamok sa Game 5 sa miaging Philippine Basketball Association (PBA) Philippine Cup finals tali sa San Miguel Beermen ug Magnolia Ang Pambansang Manok Hotshots.

Gianunsyo ang mga penalty human mingtunga sila si Tubid ug Nabong sa opisina ni commissioner Willie Marcial kagahapon.

Ang duha dili makapakita og aksyon sa mag-unang tulo ka mga duwa sa Beermen sa bag-uhay lang nagsugod nga Commissioner’s Cup.

Lakip sa mga gipangsilutan mao sila si San Miguel assistant team manager Daniel Henares ug Dr. Ramon Ibanez, nga parehong gipamulta og P50,000 unya gisuspenso og duha ka mga duwa.

Si Tubid misukmag sa tawo nga nag-costume og Spiderman human kini kalit nga midagan sulod sa korte atol sa duwa ug nakadasmag kang JuneMar Fajardo.

Si Nabong misukmag sa laing tawo, kinsa nasaypan nga kauban sa nag-costume og Spiderman.

Hinuon wala gibutyag kon unsay kalambigitan nila ni Henares ug Dr. Ramon Ibanez sa maong insidente nga unang nahitabo sa kasaysayan sa lega.

Ang Spiderman, sa dihang gikuhaan sa maskara, nailhan nga usa ka Paolo Felizarta kinsa misulod sa korte nga nagdala og placard nga may suwat nga "Vote! Love!". (ESL)