HANGTOD karon di pa motino ug mokompirmar ang mga kapulisan kon ang self-confessed drug lord nga si Franz Sabalones ba gyud to ang napatay didto sa Kaulohan niadtong Abril 18, 2019.
Kini tungod kay kapin na sa usa ka bulan ang nakalabay, wala gihapoy mga kabanay o kaliwat nga mikooperar kanila nga mao untay kakuhaan og DNA (deixudeoxyribonucleic acid) test aron pag-ila sa patayng lawas niini.
Wa usab kalikayi ang mga pagduda nga basin og usa lang kadto ka drama ug ang tinud-anay dili gyud to si Sabalones.
Gibasehan man gud niini ang nahitabo sa laing bigtime druglord nga si Jeffrey Diaz alyas Jaguar nga didto usab mabirahe sa mga kapulisan sa Kaulohan niadtong 2016, pila pa lang ka adlaw gikan sa paglingkod ni Presidente Rodrigo Duterte.
Gidungog nga posibling dili to si Jaguar wa may klaro nga hulagway nga siya kadto.
Nisamot pa ang pagduda sa dihang gidala dinhi ang patayng lawas niini, apan gidid-an ang publiko ug ang mga media sa pagtan-aw sa haya. Kon di pa to si Jaguar nganong nadala man sa kabanay ang patayng lawas nga di man na dali-dali makuha kon dili tatungod ang mokuha?
Gibana-banang libo-an ang nitambong sa lubong ni Diaz kinsa giila sa ilang dapit ug mga suod nga maayong tawo ug manggihatagon.
Pero lahi kining sitwasyon ni Sabalones kay ultimo mga tagbanay ug mga suod wala man mopakita. Ang giingong ig-agaw niini nga dali nga mikompirmar sa identity sa inilang drug lord, wala na usab na ma-trace sa kapulisan kon asa na ron.
Dunay panulti-on nga bisan unsa pa ka dautan sa tawo, imposibli nga wa gyuy tagtungod nga moatiman niini kon mamatay na. Tinuod bitaw na, pero sa sitwasyon karon nga grabi ang patay nga may kalabutan ang drugas, dili kaha nga mas gipatugbabaw sa kabanay ni Sabalones ang tukmang kahadlok?