DIGOS CITY -- Nialma ang ubang konsumante sa isda human namatikdan nga nagpadayon ang suliran sa kuwang nga timbang sa isdaan.
Gibutyag ni Rachel Olong, taga Matanao, Davao del Sur, nga duha ka higayon na siyang nabiktima sa kuwang nga gramo sa timbangan sanglit adunay mga tindera nga manikas sa merkado.
Sa social media, gipabuhagay sab ni John Clarion nga kuwang og duha ka gramo ang usa ka kilong isda nga iyang napalit niadtong Dominggo.
Nanghinaut ang mga konsumante nga mahatagan og pagtagad sa Department of Trade and Industry (DTI) sa probinsiya ang ilang reklamo.
Apan si Delia Ayana, DTI provincial director, nagbutyag nga makig-alayon sila sa Department of Agriculture aron mohimo og monitoring team aron manubag ang masakpang manikas.
Gisugyot sab sa DTI nga timbangon ang mga kinilong gipalit sa merkado diha sa mga “Timbangan ng Bayan” nga ilang gimuntar.
Si Ayana nag-awhag nga ireklamo sa consumer walfare desk ang mga tikasang tindera aron maleksiyon. (Orlando B. Dinoy)