ALAMADA, North Cotabato – Dise-nuybe ka mga tawo nga gikan nag-outing naangol human mahulog sa pangpang ang gisakyan nga trak alas 11 sa buntag, Martes, Mayo 21.
Nasayran gikan kang North Cotabato Police Provincial Office director Colonel Maximo Layugan nga mga biktima pauli na unta sa Jade Valley Homes sa dakbayan sa Davao gikan nanuroy ug naligo sa Asik-Asik Falls sa Alamada sakay sa Suzuki utility vehicle.
Apan pag-abot nila sa Camp Paulino Santos sa Barangay Dado, kalit nga nawad-an og preno ang trak hinungdan nga wala na makontrola sa drayber nga si Arlan Vic Kristoffer Billena ang manobela ug diretso nga nahulog sa bung-aw daplin sa kalsada.
Gitabang ang mga biktima sa mga molupyo sa dapit ug gihatud ngadto sa Alamada Community Hospital apan dali sab nga gibalhin sa Southern Philippines Medical Center sa Davao City.
Nakahiagom og grabeng angol ang drayber mismo sa trak ug ang 61-anyos nga si Romeo Arlan nga naglingkod tapad kaniya. Edgar E. Fuerzas