GIAWHAG sa Philippine Drug Enforcement Agency (PDEA) Davao nga mouyon ang mga tulunghaan nga ipailawom sa random drug testing ang mga tinun-an karong pag-abli sa klase.
Kini ang gibutyag ni Atty. Ben Joseph Tesiorna, ang assistant director sa PDEA-Davao, atol sa gipahigayon nga AFP-PNP press conference sa The Royal Mandaya Hotel, Miyerkules, Mayo 22.
Alang kang Tesiorna nga kinahanglan dunay drug test alang sa mga tinun-an, apan iyang gipasabot nga magdepende gihapon kini sa administrasyon sa matag eskwelahan.
“As long as it is provided in the hand book, and we encourage the schools to do it,” ingon ni Tesiorna.
Giingon sab sa opisyal nga duna nay usa ka unibersidad nga nagkomperma kinsa nakig-istorya sa PDEA-Davao aron magpatuman og random drug testing sa ilang mga estudyante.
Alang sa PDEA ang drug test makatabang aron mamahimong sumbanan sa mga tinun-an aron likayan ang paggamit sa ilegal nga druga. (Richy F. Nalagon)