Hantakan gibulabog sa nag-‘puok’

NABULABOG kadali ang kalalakin-an nga naghantak sa Barangay 31-D, Poblacion, dakbayan sa Davao Martes sa gabii, Mayo 21, human nagselos ang kapuyo kay gikidhatan ang iyang partner.

Nanghuboy ang mata ni alyas Roger, 54-anyos, traysikad drayber dihang giayo’g sumbag ni Ronelo, 45-anyos, traysikad drayber sab, kay iyang nasakpan nga perteng kidhat ni Roger ngadto sa iyang partner.

Matud sa Sta. Ana Police Station kon diin nagpa-blotter si Roger nga mopasaka kini og reklamo nga physical injury batok kang Ronelo.

Giingon ni Roger nga igo lang niya gikidhatan si Maricar, kay seksi kaayo kining miapas kang Ronelo didto sa hantakan ug wala na siya’y laing intensyon.

Apan, wala nasayran ni Roger nga samtang miduol si Maricar, didto pod diay nagtan-aw ang mata ni Ronelo kang Roger maong nasakpan siya.

Diha dayon, giayo’g sumbag ni Ronelo si Roger ug nabungkag ang hantakan.

Hinuon giangkon ni Roger nga nakuha gyud ang iyang atensyon ngadto kang Maricar gumikan sa pinuok niini nga short pants.

Daling mikuha og medical certificate si Roger sa Southern Philippines Medical Center aron lig-on ang iyang pagpasaka og reklamo batok kang Ronelo.

Ang maong kaso, gipaagi una sa barangay aron didto sila mahusay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph