GIPAABOT nga malaugluagan na ang sagad suliran sa pagdasok sa mga tinun-an sa mga pampublikong tunghaan sa dakbayan sa Lapu-Lapu ning school year 2019-2020.
Kini gumikan sa pagbukas sa tulo ka mga bag-ong public high school sa dakbayan alang sa pagbukas sa klase.
Ang mga bag-ong tunghaan mao ang (1) Buyong High School nga nahimutang sud sa Buyong Elementary School sa Barangay Maribago, (2) Babag Night High School sa Babag ug (3) Tungasan High School sa Brgy Tungasan isla sa Olango.
Matod ni Dr. Marilyn Andales, ang schools dDivision superintendent, sa iyang banabana moabot sa dul-an 5,000 ka mga tinun-an ang enrolee sa Sta Rosa High School matag tuig hinungdan nga ipahigayon gayud kanunay ang shifting sa klase apan pinaagi sa presensya sa Tungasan High School hayan bisan makuhaan lang kini ug dul-an 300 ka mga tinun-an dako na kaayo kini ug tabang.
Moabot usab sa kapin 2 ,000 ka mga tinun-an ang gikatakdang motungha sa Maribago National High School sa Brgy. Maribago hinungdan nga ang presensya sa bag-o lang nga Buyong High School nga magpaluag sa naasoyng tunghaan.
Ang Babag Night High School usab maoy maghatag sa mga tinun-an sa naasoyng barangay ug kasikbit niini ug opsyon sa pagtungha bisan pa man kun manarbaho sila panahon sa adlawan.
“Nihangyo man sila (ang mga tinun-an) nga mam asa man mi padulong night man mi working unya so mao to nga nag-open ta kay ang mahitabo gud sa uban nga medyo layo sila sa public adto sila sa private unya magbayad baya sila,“ matod ni Andales.
Samtang, gibutyag ni Lapu-Lapu City Mayor Paz Radaza ug umaabot Congresswoman sa Lone District sa dakbayan nga iya gayud tagaan og pagtagad ang pagpatukod unya ug dugang classrooms sa dakbayan hilabi na nga kanunay nagdako ang populasyon sa mga tunghaan matag tuig.
Iya usab nga lihokon ang dugang mga plantella sa mga magtutudlo sa mga tunghaan aron masolusyonan usab ang kakuwang sa mga magtutudlo sa mga tunghaan.
“Tan-awon lang nato unsay mga additional panginahanglan and most probably ideal man gyud kaayo ni nga adunay mga high school in some areas kay nakadaginot baya ang mga ginikanan at the same time ang mga bata nga naa diha mas daghan na ang moeskwela because duol ra man,” matod ni Radaza. (GCM)