SA NAGPADAYON nga pagbag-o sa panahon sa Sugbo, hilabi na nga kalit lang mobundak ang kusog nga uwan, aduna kini maayo nga gidala alang sa supply sa tubig.
Gibutyag sa Metropolitan Cebu Water District (MCWD) nga napun-an ang supply sa Jaclupan Facility sa dakbayan sa Talisay sugod niadtong Martes, Mayo 21.
Matod sa tigpamaba sa MCWD nga si Charmaine Rodriguez-Kara, gikan sa 6,900 cubic meters nga ma-supply sa Jaclupan Facility, nisaka kini ngadto sa 10,000 cu.m. matag adlaw.
Gipahibawo ni Kara nga aduna’y maayo nga epekto ang nahitabo nga kusog nga pag-uwan niadtong nakalabay nga semana.
Apan nagpabilin nga anaa sa kritikal nga lebel ang water supply sa Jaclupan Facility tungod kay anaa kini ubos sa tunga sa kinatibuk-an nga ma-supply niini nga anaa sa 33,000 cu.m. matag adlaw.
Bisan pa man nga nisaka ang supply sa Jaclupan, nagpabilin nga wala na magamit ang Buhisan Dam.
Nagpabilin usab nga aduna’y mga konsumidor ang MCWD nga hinay ang agas o kaha nagrasyon kini kay dili na maabot ang supply kanila.
Ang Philippine Atmospheric, Geophysical and Astronomical Services Administration (Pagasa)-Visayas sa ilang bahin nibutyag nga local thunderstorm lang ni ang nasinati karon sa Sugbo nga pag-uwan.
Matod sa officer-in-charge sa Pagasa Visayas nga magpadayon ang susama nga ingon niini nga panahon hangtod sa Oktubre diin nasinati usab ang El Niño phenomenon. (HBL)