Abag sa kalamidad sa Kapitolyo magpadayon

BISAN kon bag-o na ang modumala sa pangagamhanan sa lalawigan sa Sugbo, dili maapektuhan ang pag-apud-apod sa mga hinabang alang sa mga local government unit nga naapektuhan sa hinay nga El Niño.

Matod ni Rhee Telen Jr., disaster officer sa Provincial Disaster Risk Reduction and Management Office (PDRRMO), ipadayon nila ang revalidation ug distribusyon sa ayuda sa mga LGU tungod kay naandam na nila ang tanang purchase requests sa wala pa ang piniliay niadtong Mayo 13.

Sumala niini niabot na og P32 milyones gikan sa P59 milyones nga quick response fund sa PDRRMO alang sa karong 2019, ang nagamit aron ayudahan ang mga lungsod ug siyudad.

Sa kantidad, P10 milyones ang nagamit alang sa pagpalit og food items sama sa mga sinako nga bugas ug mga delata nga gipaagi sa Provincial Social Welfare and Development Office, samtang P9 milyones ang gigamit sa pagpalit og water containers alang sa mga mag-uuma nga gipaagi sa Office of the Provincial Agriculturit.

Laing P10 milyones alang sa pagpalit og dugang water containers ug pag-abang sa water tankers nga maoy nagrasyon og tubig sa lainlaing mga LGU sama sa Tabogon, Borbon, Dalaguete ug mga lungsod sa isla sa Camotes.

Kapin sa P1.2 milyones ang gigamit sa pagpalit og vitamins alang sa kahayopan.

Hangtod sa Mayo 22, niabot na og P121,704,303.84 ang danyos sa pananom, fishery ug livelihood sa 35 ka mga LGU sa lalawigan gumikan sa hinay nga El Niño.

Apil sa mga dapit nga apektado ang mga siyudad sa Bogo, Carcar, Danao, Mandaue, Naga ug Toledo, ug mga lungsod sa Alcantara, Alegria, Aloguinsan, Asturias, Badian, Balamban, Bantayan, Carmen, Compostela, Consolacion, Daanbantayan, Dalaguete, Ginatilan, Malabuyoc, Medellin, Moalboal, Pilar, Pinamungajan, Poro, San Fernando, San Francisco, San Remigio, Santa Fe, Santander, Sibonga, Sogod, Tabuelan, Tuburan ug Tudela.

Base sa updated report, ang lungsod sa Bantayan ang nakatala og labing dako nga kadaot nga niabot og P24 milyones sa 300 ka mga ektarya sa guso gumikan sa ice-ice disease.

Nagsunod ang lungsod sa Tuburan nga P19.9 milyones, Compostela nga P14.3 milyones ug P11.099 milyones sa Santa F.

Hangtod sa Miyerkules, Mayo 22, nikabat na og 13,128 ka mga pamilya ang apektado sa hinay nga El Niño o 67,057 ka mga indibidwal.

Dugang sa record sa PDRRMO, 962 ka mga mag-uuma ug 7,622 ka mga mananagat ang apektado sa tumang kainit sa panahon.

Samtang 16 na ka mga LGU ang nideklarar og state of calamity sa ilang lugar. Naglakip kini sa mga siyudad sa Carcar, Talisay ug Danao ug mga lungsod sa Ginatilan, Minglanilla, Samboan, Catmon, Sogod, Tudela, Dumanjug, Alcoy, Santander, Carmen, Compostela, Asturias ug Madridejos. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph