Daghang anggulo ang gisubay sa Police Regional Office (PRO) 7 sa kasong pagbanhig-patay kang P/Captain Delfin Bontuyan niadtong Martes sa hapon, Mayo 21, sa dan A. Soriano eskina St. Pope John Paul II Avenue sa Mabolo, siyudad sa Sugbo, usa niini ang ilegal nga drugas.
Apan wala pay hingpit nga matumbok samtang nagpadayon pa ang imbestigasyon sa Cebu City Police Office (CCPO) sa pagpatay sa kanhi sakop sa Criminal Investigation and Detection Group (CIDG)-7.
Si Police Brigadier General Debold Sinas, direktor sa PRO 7, nagkanayon nga si Bontuyan gilabay sa Cordillera Administrative Region (CAR) niadtong 2016 dihang nilingkod na sa pwesto si Presidente Rodrigo Duterte ug gilabay na sab sa Autonomous Region in Muslim Mindanao (ARMM).
Gibutyag ni Sinas nga nalakip ang namatay sa listahan sa protektar sa drug personalities apan, way nakuhang ebedensya sa imbestigasyon sa Regional Internal Affairs Service (RIAS) 7 niadto.
Nagduda si Sinas nga drug personalities ra usab nag-ambush kang Bontuyan .
Sa laing bahin, si Sinas nisumalik sa pag-akusar kang Cebu City outgoing Mayor Tomas Osmena nga protektor sa mga pulis nga nalambigit sa ilegal nga drugas human ang naulahi nipasangil na usab nga pulis maoy nagbanhig-patay kang Bontuyan.
Gisalikway niya ang paasangil ni Osmeña nga dunay bahid sa politika ang kamatayon sa kanhi sakop sa CIDG 7 human ang anak niini Sangguniang Kabataan (SK) Chairman sa Talamban. (AYB)