ANG kanhi sakop sa Criminal Investigation and Detection Group (CIDG 7) nga gipusil patay sa upat ka mga tawo nga nag-angkasay sa motorsiklo niadtong Martes, Mayo 21, sa Pope John Paul II Ave. ug A. Soriano St., Barangay Mabolo, adunay unom ka mga kaso nga gipasaka sa kapulisan sa Visayas Ombudsman tungod sa di mapasabot nga kabtangan.
Mga kasong dishonesty ang gipasaka sa Regional Internal Affairs Service 7 sa buhatan sa Ombudsman Visayas niadto pang Disyembre 2016 batok kang anhing Police Captain Delfin Bontuyan.
Matod ni Prince Robles, chief sa Intelligence and Investigation Division sa RIAS 7, nga ang maong mga kaso pending pa sa Ombudsman.
Wa motug-an si Robles kon unsa kini nga mga kaso sanglit wa pa siya sa RIAS 7 sa dihang gipaubos si Bontuyan sa imbestigasyon.
Gipaubos sa imbestigasyon sa RIAS-7 ang kapin sa 100 ka mga pulis sa rehiyon 7 nga gipangdudahan nga adunay kabtangan nga di nila mapasabot ug giingong protector sa mga nalambigit sa illegal nga drugas.
Una sila nga gidudahan nga mga narco cops apan tungod kay way ebedensya nga gihuptan ang PRO 7 nga apil sila sa illegal nga drugas, ang ilang kabtangan ang gisusi kon motakdo ba sa ilang binuwan nga suweldo.
“As far as Internal Affairs is concerned, I verified it with the records. Naay case nga na file sa iyaha as early as 2016. But as to what the case is all about, dili ko ka sulti kay during that time I was not appointed as IID chief, it is pending now sa Ombudsman ang case six counts of dishonesty,” matod ni Robles.
Tungod sa kamatayon ni Bontuyan mahimong maabswelto ang iyang mga kasong dishonesty, dugang ni Robles.
Nanguhag ebidensya
Ang Mabolo police station nanguha nag mga ebidensya sama sa CCTV camera lakip na ang mga dash camera sa mga sakyanan nga nakakuha sa insidente sa pag ambush kang Bontuyan.
Matod ni Brig. Gen. Debold Sinas nga sa pagkakaron padayon nga wa silay matumbok nga suspek tungod kay misubay pa sila sa mga kuha sa CCTV camera sa dapit.
Nakig-alayon na usab ang PNP Autonomous Region in Muslim Mindanao ug nasuta nga ilang sakop si Bontuyan.
Andam usab si Sinas nga magpadalag personnel sa balay ni Bontuyan alang sa area security samtang gihaya pa ang lawas kon mohangyo ang pamilya.
Iyang giklaro nga dili sama sa ubang mga pulis nga napatay sa anti drug operation diin sila ang target, mahimo ra nga makaduaw ang mga higala niini nga pulis.
Dugang niya nga ang giingong kalambigitan ni Bontuyan sa illegal nga drugas wala pa mapamatod-i nga tinuod ug angay pa nga tratuhon nga inosente.
“No problem. He’s not from PRO-7and wala pa man napamatod-an nga he was directly involved. And we do not know who is the suspect of the shooting incident sa iyaha. Unlike kase kay Dumpit case, if you like to compare it kay Dumpit, kasi he was caught in the operation with the NBI,” matod ni Sinas.
Gihimakak usab niya nga dugay nakaresponde ang mga pulis sa Mabolo sa dihang nag buto-buto na bisan gibana-bana nga kapin sa 50 metros ang gilay-on sa estasyon.