SUPERBALITA CEBU

Tapales, Tepora moaway sa Amerika batok sa managlahing kontra

Marlon “Nightmare” Tapales ug Jhack “El Capitan” Tepora (SunStar file)

DUHA ka mga Pinoy boxing champions Jhack “El Capitan” Tepora ug Marlon “Nightmare” Tapales moaway batok sa managlahing kontra karong Sabado, Hunyo 1, 2019 (Domingo sa buntag RP Time) sa Soboba Casino, San Jacinto, California, USA.

Ang walhon ug undefeated nga si Tepora, 24 anyos, 5’6, (22-0, 17KO) originally gikan sa Tiwasan, Catarman, Liloan, Cebu apan nag training karon sa California ubos ni former champion-turned trainer Rodel Mayol.

Iyang ikabagat sa 128-lb weight limit sa 10-round non-title fight si knockout artist American Jose Luis “Relampago/Flash of Lightning” Gallegos, 24 anyos, 5’8, tuohon, nga aduna'y boxing card nga (16-6, 12KO).

Sa interview sa Superbalita Cebu via video call, si Tepora nagkanayon nga dili siya makasaad sa knockout apan mosaad siya sa kadaugan.

“Nakakita nako sa away sa akong kontra sa video, maayo siya (Gallegos) kusog, busa dili ko mokumpyansa basta bahala’g mangabungi ni. Ang importante modaug gyud ta,” palabtik ni Tepora kinsa miangkon nga idol niya si Minnesota Timberwolves guard Derrick Rose ug center Karl-Anthony Towns.

Nikabat na sa tulo ka buwan ang ensayo ni Jhack human nahiabot sa US kuyog iyang asawa nga si Dinah Comision Tepora niadtong Valentine's Day dihang si US-based famous matchmaker Sean Gibbons nitugyan kaniya ngadto kang Mayol.

Si Tepora kontroberysal kaayo ang iyang unang pagtaak sa US niadtong Enero sanglit moaway unta sa undercard sa Pacquiao-Broner fight sa MGM Las Vegas apan nakanselar sanglit ni over siya’g lima ka libras nga iya untang kontra si Mexican Hugo Ruiz.

“Over pa ko karon 7 pounds apan sigurado mi ani nga makuha ang timbang kay duha pa ka semana gikan karon. Akong trainer, Rodel (Mayol), gi-monitor permi akong weight permi. Gitambagan ko nga mobuhi’g daghang sumbag unya gamit sab sa depensa,” segunda ni Tepora.

Miangkon si Tepora nga wala pa gihapon siya ka-adjust sa American nga pagkaon sanglit mangita gyud iyang tiyan sa bugas humay. Hinuon, limitado na iyang rice, chicken adobo, prutas, tubig sanglit gidid-an na siya sa juice, soft drinks.

“Ako ra'y nag-angga nako nga El Capitan, kay hilig ko duwa basketball unya tan-aw sa PBA unya giganahan ko nga naa'y El Presidente Ramon Fernandez, so mao ni akong nahuna-hunaan. Sa tanang Bashers o misaway nako pasalamat gyud ko kay kamo ang nakapausab ug nakapadasig kanako nga mohimo sa subsob nga ensayo,” panapos ni kanhi WBA interim Featherweight King Tepora.

Samtang ang natawo sa Tubod, apan mibalhin na sa Kapatagan, Lanao del Norte nga former WBO Bantamweight champion Tapales (32-2, 15KO) makigbinukbokay ni Mexican Roberto “Azabache/Jet” Castañeda (23-11-2, 16KO) alang sa 10-round Featherweight non-title fight.

Ang Tepora vs Gallegos ug Tapales vs Castañeda pulos undercard sa Hugo Centeno Jr. vs Willie Monroe Jr. nga gidalit sa TGB Promotions nga isalida sa Fox Sports-1 Television. (Daniel Quindao Guden, US Correspondent)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph