BISAN sa mga nasinati na nga mga pag-ulan halos kada adlaw sa bisan asa nga parte sa Kabisay-an ning bulan sa Mayo, Philippine Atmospheric Geophysical and Astronomical Services Administration (PAGASA) Mactan nipahibalo nga ubos kaayo kon below normal ang natala nga sukod sa pag-ulan ning buwana.
Halos kada-adlaw na nasinati ang mga pagpanag-om, inubanan pa sa mga pagpanugdog, ug anaa gyud ang mga pagtutaligsik, hangtud na sa hinay, kasarangan ug usahay makusog nga pag-ulan.
Kasagaran masinati kini sa hapon, gabii o sa kaadlawon.
Apan bisan pa man matud ni Netherlen Saletrero ang weather specialist sa PAGASA Mactan nga sukad Mayo 1 hangtud sa Mayo 20, aduna lang silay nasukod nga 13.1 millimetres, kon 12 porsyento lang sa kinatibuk-an.
Ubos kaayo kini sa average rainfall nga gipaabot alang unta sa matag bulan sa Mayo nga moabot og 108.8 millimetres.
Sa gihimo usab nga weather outlook niadtong Marso 22, nasuta nga sukad Oktubre sa niaging tuig hangtud Mayo 20, 65 porsyento sa kinatibuk-ang parte sa nasud ang nakasinati og huwaw (drought), mao kini ang pinakataas nga kategorya tungod sa kainit nga dala usab sa weak El Niño.
Ubos sa huwaw o drought, mao ang dry spell, mas ubos niini ang dry condition ug ang ‘not affected’.
Lakip sa 65 porsyento, mao ang Sugbo. Samtang ang gamay nga parte sa Mindanao ang nakasinati lang og dry spell ug dry condition.
“Gahapon ang atong Climatology department ang nag-collect og tanang data sa atong rainfall nagpagawas sila og drought assessment so makita nato sa map, nga 65 percent sa Philippines naka-drought na siya and dinhi sa Visayas area, whole areas sa Western ug Central and half sa Eastern area. Ang drought ang pinaka-dry na nga category. Tungod kini sa presensya sa weak El Niño,” pagpasabot ni Saletrero.
Gipasabot ni Saletrero nga ang nasinati karon nga panagsang’ katag nga pag-ulan, tungod sa localized thunderstorm, nga normal ang tungod usab sa kadaghan na nga umog nga dala sa hangin karon.
Ug sa kainit sa adlawan hinungdan nga makahimo kini og pagpanag-om nga moresulta sa pag-ulan.
Wala ra usab silay gi-monitor nga weather disturbance nga makaapektar sa panahon sa atong nasud, hangtud na sa weekend.
Anaa hinuon ang frontal system, nga maoy nagdalag ulan sa Luzon area.
Sa Hunyo, gilantawan nga mobalik sa normal ang pag-ulan kon gidaghanon sa sukod sa ulan hangtud na sa Agusto.
Apan sa Setyembre gilantawan usab nga makasinati og menus nga pag-ulan, hinungdan nga giawhag ang publiko nga mas maayo saluron ang tubig ulan, aron maoy magamit sa ubang panginahanglanon, pagdaginot sa tubig nga mainum.