SUBLING nanawagan ang buhatan sa Commission on Elections (Comelec)-Northern Mindanao ngadto sa mga naparot ug nangdaog nga mga kandidato sa rehiyon.
Nga unta mag-inisyatiba sa pagpanglimpyo sa ilang mga nahibiling campaign material nga nakapulot pa sa nagkalain-laing dapit.
Matud ni Comelec-Northern Mindanao Regional Director Wilfred Jay Balisado nga unta kadtong mga nangdaog nga mga pulitiko maoy moinisyatiba sa paglimpyo sa ilang mga tarpaulin sa kadalanan aron maoy magsilbing ehemplo.
“Atong hangyo sa mga kandidato ug kami nanawagan kay dinhi sa Cagayan de Oro wala pa gyod nag initiate nga mga kandidato nga manangtang sa ilang mga tarpulin. Kadtong mga nakadaog nga unta they will find time and effort, it’s also their commitment nga humana man ilang hipuson, ug sa mga napilde pod mas maayo siguro nga magpakita sila nga in defeat they are still humble by their defeat, ug ilang mapakita nga sports pod sila,” panawagan niini.
Lakip sa iyang gipanawagan nga unta magduso na sa ilang Statement of Contributions and Expenditures ang mga kandidato nga nidaog ug napilde sa dili pa ang Hunyo 13, aron ilang masuta kon nakatuman ba sa gabayan sa Comelec ug wala milapas sa galastuhon nga gitagana alang kanila.