PADAYON nga nagpahimangno ang City Disaster Risk Reduction and Management Department (CDRRMD) ngadto sa mga motorista ilabi na sa mga nakamotorsiklo ug lango sa ilimnong makahubog nga sagad maoy mabiktima sa aksidente.
Nasayran nga kini ang dunay pinakataas nga natala nga ihap sa narespondehan sa CDRRMD nga aksidente diin anaa sa mga 350 ngadto sa 400 matag bulan.
Nagpahimangno si Nick Jabagat, ulo sa CDRRMD, ngadto sa mga nagmaneho og motorsiklo nga kanunay nga mag-amping ug dili magmaneho nga nakainom.
“Hinaot unta nga ang mga nagmotor especially kay sila man always involved sa mga insidente sa dalan nga unta maghinay-hinay kani man gyud kasagara nga naa gyud impluwensiya sa mga ilimnong makahubog,” pahimangno ni Jabagat.
Gidugang pa nga dili lamang sa mga national highways karon gakahitabo ang mga aksidente apan lakip na sa mga kadalanan bisan sa mga barangay hinungdan nga nagpahimangno usab kini diha sa mga barangay nga bantayan ilabi na nga sagad magparada sa daplin sa dalan matag panahon sa gabii nga rason usab sa aksidente.
“Kami gahatag pud mi og abiso sa mga barangays nga palihog bantayi kay pagkagabii biyaan lang mag sakyanan nakapark, sa karon dili lang sa highway lang pati gihapon sa mga barangay roads,” dugang niini.
Giingong sa ilang talaan nasuta nga sagad sa mga biktima mao ang nakamotorsiklo.