GITAKDANG bansayon ang 80 ka mga matudlo isip Barangay Consumer Welfare Officer (BCWO), human usab duna nay ordinansa kalabot niini nga maoy magbantay sa mga nagpasobra og patong sa mga palaliton ilabi na sa mga lagyong barangay sa siyudad sa Cagayan de Oro.
Sa pakighinabi kang abogado Edgardo “Egay” Uy, co-chairman sa City Price Coordinating Council (CPCC), gibutyag niini nga gitakdang magtigom ang CPCC aron hisgotan ang angayang buhaton pagtudlo og usa ka kagawad nga maoy mamahimong motutok sa mga reklamo sa sobrang pagpatong sa mga presyo sa mga katindahanan ilabi na sa mga lagyong dapit sa siyudad.
Tumong niini nga matabangan ang mga konsumer nga dili na masayang ang oras, kwarta ug panahon nga moanha pa sa CPCC, sa buhatan sa Department of Trade and Industry (DTI) ug bisan sa Department of Agriculture (DA) kung ugaling dunay mga reklamo.
“Naa naman tay ordinansa kada Barangay motudlo og BCWO kay para katong mga problema sa barangay nga lagyo dili na moanhi dinhi kung naay reklamo di ba kay magplete pa, ilang oras, pwedi didto na sa ilang kagawad nga ilang tudloon,” matud ni Uy.
Giingong dako kining tabang alang sa mga konsumidor ilabi na nga ang usa ka tindahan nagpasobra og presyo pwedi dayon kini mareklamo.
“Dako nag tabang gayud sa mga consumers, pananglitan sa pikas tindahan ang presyo butang ta P1 sa pikas P5 pwedi i-reklamo, overcharging kaayo, ma-solve na dayon sa barangay lang so maka-save gyud ang consumer og time,” dugang niini.
Gibutyag pa niini nga ordinansa na kini sa dakbayan ug gikinahanglan nga magtuman niini ang 80 ka mga barangay aron usab nga magpahigayon na dayon kini og training kung ugaling makatudlo na ang matag barangay.