GIINGONG usa sa gitan-aw sa lokal nga kagamhanan sa dakbayan sa Cagayan de Oro ang pagpalapad sa serbisyo ug metropolisasiyon ug usa niini mao ang pagpalit og helicopter nga magamit sa City Disaster Risk Reduction and Management Department pag-rescue.
Sa pakighinabi kang Nick Jabagat, sa CDRRMD, gibutyag niini nga ubay-ubay na ang kagamitan sa dakbayan alang sa pagresponde sama sa mga insidente sa kadalanan, water rescue ug uban pa apan nagkinahanglan pa usab sila og dugang ug upgraded nga mga kagamitan gumikan nagkataas man ang ihap sa mga aksidente.
“Mas daghan, mas maayo hangtod karon ato pa ng giplanohan to invest more on equipment, siguro update lang, naa naman ta’y water rescue equipment. Mas maayo tong updated kung unsay bag-o para mas maserbisyohan ang katawhan sa pinakadali mas maayo,” matud ni Jabagat.
Giingong usa sa mga plano ni Cagayan de Oro Mayor Oscar Moreno, mao ang metropolisasiyon ug niini modako na usab ang dapit nga marespondehan sa CDRRMD, hinungdan nga lakip kini sa gitan-aw, apan sa pagkakaron ila una nga gikonsidera ang tanyag sa usa usab sa nagpapili kaniadto nga si Felix Borres, kinsa nidawat na usab sa iyang kapildihan sa wala pa mismo ang adlaw sa eleksyon ug andam nga mosuporta sa pagpanerbisyo ni Moreno.
Gidugang pa niini nga gitanyag kini ni Borres nga gikonsidera usab sa CDRRMD ilabi na kung ingkaso nga kinahanglanon gyud kini.
“Lage uban sa plano ni mayor nga metropolization modako-dako atong area sa marespondehan, so usa na sa atong gitan-aw but for now during the campaign na meet namo si Borres, very open pud siya sa iyang kapasidad. We try to coordinate sa iya about ana nga services and very open sab siya once ma available iyang helicopter,” dugang niini.